शंकर पोखरेलको तालुमा फल्यो आलु

१९ बैशाख, काठमाडौं । माधव नेपाल पक्षले फ्लोर क्रस गरेमा कर्णाली प्रदेशकै हालतमा पुगिएला की भन्ने त्रासले लुम्बिनी प्रदेशका मुख्यमन्त्री चिन्तित थिए । त्यसका लागि आज उनको भाग्यको फैसला हुनेवाला थियो । तर पोखरेलका लागि परिस्थिति अनुकुल भइदियो । जनता समाजवादी पार्टीले आफूलाई सहयोग गर्ने चार जना सांसद्लाई पदमुक्त गरेपछि पोखरेलका लागि सत्तायात्रा अझै सहज भैदियो ।

प्रदेशसभामा रहेको कुल ८७ मध्ये एमालेको ४१ छन् । तर भाग्यको खेल भनौं–माओवादीका दुई र जसपाका चार सांसद पदमुक्त भएपछि प्रदेशसभामा अब ८१ सदस्य मात्र बाँकी रहे । यो अंक गणितमा एमाले एकल बहुमतमा छ । त्यसको लाभ उठाउन पोखरलले नयाँ जुक्ति रचे – राजीनामा गरेर बहुमतकै सरकार गठन गर्ने ।

आज बिहानै पोखरेलले राजीनामा गरे । अब उनकै नेतृत्वमा बहुमतको सरकारको दाबी गरेका छन् । प्रदेशसभामा एमाले संसदीय दलले फेरि पनि पोखरेलकै नेतृत्वमा बहुमतको सरकार बनाउने निर्णय गरिसकेको छ । अब न त फ्लोर क्रसको चिन्ता न दुई वर्षसम्म अविश्वास प्रस्तावकै त्राश ।

प्रदेशसभामा ४१ जनाले समर्थन गर्ने वित्तिकै उनी बहुमत प्राप्त मुख्यमन्त्रीको हैसियतमा उक्लिन्छन् । त्यो खेल उनले खेलेका छन् । समय परिस्थितिले पोखरेललाई फेरि पनि बाँकी दुई वर्ष अर्थात पूरै कार्यकाल मुख्यमन्त्री बन्ने अवसर दिलाएको छ । पोखरेलले राजीनामा नै गरिसकेपछि आजबाट सुरु हुने विशेष अधिवेशनको कुनै बिजनेस रहेन । नयाँ प्रकृया अनुरुप पोखरेल बहुमत प्राप्त मुख्यमन्त्री बन्दैछन् ।