कोरोना संक्रमित पूर्वरानीको अवस्था अझै जटिल

१९ बैशाख, काठमाडौं । कोरोनाको दोस्रो लहरको चपेटामा परेकी पूर्वरानी कोमलको स्वास्थ अवस्थ अझै जटिल नै छ । गएको सातादेखि नै उनलाई हाइ फ्लो सपोर्टमा राखेर उपचार भइरहेको छ । पछिल्लो अवस्थामा प्लाज्मा थेरापी पद्धति बमोजिम उपचार गरिएपनि सुधार हुन सकिरहेको छैन ।

नर्भिक अन्तराष्ट्रिय अस्पतालमा उपचाररत कोमलको स्वास्थ अवस्था अझै जटिल रहेको सूचना अधिकृत सोमनाथ बाँस्तोलाले दिएका छन् । अस्पतालको आइसीयु कक्षमा अक्सिजन दिएरै उपचार भइरहेको उनले बताए ।

पूर्व राजा ज्ञानेन्द्रसहित छोरी प्रेरणा पनि कोरोनाबाट संक्रमित भएर यही अस्पतालमा उपचाररत छन् । दुबै जनाका स्वास्थमा भने उल्लेख्य सुधार देखिएको छ । निजी चिकित्सक डा. किशोर राणा नेतृत्वको टोलीले शाह परिवारको उपचार गरिरहेको छ । पूर्व राजदम्पति वैशाख ५ गते भारतको हरिद्वारमा आयोजित कुम्भ मेलामा सहभागी भएर फर्केका हुन् । उनीहरुमा वैशाख ७ गते नै संक्रमण पुष्टी भएको थियो ।