मास्कमा दोब्बर मूल्य लिएर बेच्दा २ लाख जरिवाना

१९ बैशाख, काठमाडौं । कोरोना भाइरस संक्रमणको जोखिम उच्च रहेको समयमा पनि ४ रुपैयाँको पर्ने मास्कलाई ८ रुपैयाँमा बेच्दा २ लाख जरिवाना तिर्नु परेको छ । वाणिज्य, आपूर्ति तथा उपभोक्ता संरक्षण विभागले मास्कमा दोब्बर मूल्य लिएर बिक्री गर्ने व्यवसायीलाई जरिवाना गरेको हो।

विभागले आइतबार काठमाडौंको त्रिपुरेश्वरमा रहेको ‘अल फाइन सर्जिकल सप्लायर्स’ लाई २ लाख रुपैयाँ जरिवाना गरेको हो। विभागकाका अनुसार उक्त सप्लायर्सले ४ रुपैयाँ ४६ पैसामा खरिद गरेको मास्क ८ रुपैयाँ ३८ पैसाका दरले बिक्री गरिरहेको थियो। यसरी झण्डै दोब्बर मूल्यमा मास्क बिक्री गर्नु उपभोक्ता संरक्षण ऐन २०७५ विपरित रहेको विभागको ठहर छ।