कोरोना नियन्त्रणमा दमक नगरपालिका सक्रिय

२० वैशाख, दमक । विश्वभरी फैलिएको कोरोनाको दोश्रो भेरियन्टले पूर्वि नेपालको झापामा पनि डरलाग्दो रुप लिने देखिए पछि नियन्त्रणका लागि दमक नगरपालिकाले सक्रियता देखाएकाे छ । फेरि पनि विश्वलाई त्राहिमाम पार्दै नयाँ भेरियन्टको कोरोना संक्रमणबाट जनजीवन त्राहिमाम बनेको छ ।

झापा जिल्लामा गत बर्ष भन्दा पनि डरलाग्दो तवरले फैलिरहेको भेरियन्टबाट दमकमा हालसम्ममा २ जनाको मृत्यु भैसकेको छ । दमक नगरपालिकाले दिएको जानकारी अनुसार सोमबार बिहानसम्ममा नयाँ भेरियन्टबाट ७० जना संक्रमित भएका छन् ।

नगरपालिकाका स्वास्थ्य शाखाका कर्मचारी कुबेर भट्टराईले कोरोना महामारीको संक्रमणमा परी यस अघि नै दमकका एकजना बृद्धाको मृत्यु भैसकेको बताए । धरानस्थित वीपी कोइराला स्वास्थ्य बिज्ञान प्रतिष्ठानमा उपचारका क्रममा दमक–२ की ६५ बर्षिय बृद्धाको मृत्यु भएसँगै दमकमा कोरोना महामारीबाट मृत्यु हुनेको संख्या २ पुगेको छ ।

रोगको महामारी थप फैलन नदिन दमक नगरपालिकाले नगरबासीलाई सुसुचित गराई रहेको र स्थिति भयाभह हुन नदिन अत्यन्तै सतर्कता अपनाईएको समेत नगरपालिकाले जनाएको छ ।

गत बर्ष दमकमा कोरोनाको महामारी अत्यधिक रुपमा बृद्धि हुन थाले पछि दमक नगरपालिकाको पहलमा खोलिएको कोरोना अस्पताल महामारी रोकथाम भएसँगै बन्द गरिएको थियो । हाल कोरोनाको संक्रमण अत्यन्तै भयाभह हुने अवस्था देखिएसँगै बिगत केहि समय अघिदेखि बन्द रहेको कोभीड अस्पताल पुन सञ्चालनमा ल्याईएको जानकारी दिइएको छ ।

दमक अस्पतालको मातहतमा रहेको उक्त अस्पताल दमक–२ स्थित बेलडाँगीमा आइतबारबाट पुनः सञ्चालनमा ल्याईएको नगरपालिकाकी पवक्त समेत रहेकी दमक नगरपालिकाकी उपप्रमूख गिता अधिकारीले बताएकी छिन् । हालसम्म उक्त कोभीड अस्पतालमा ४ जना संक्रमितहरु उपचाररत रहेका छन् ।

दमक नगरपालिकाले कोरोना महामारीका बिरुद्धमा गत बर्ष पनि उल्लेख्य क्रियाशिलता देखाएकोमा हाल आएर फेरि पनि उत्तिकै क्रियाशिलता देखाएको छ । नगरबासीको स्वास्थ्यमा अत्यन्तै सम्बेदनशील देखिएको दमक नगरपालिका अहिले नगरबासीको जिवन रक्षाको लागि दिनरात नभनी लागि परेको दमकका स्थानीय बासीहरुको भनाई रहेको छ ।

अत्यन्तै प्रभावकारी ब्यवस्थापनका कारण दमकको कोभीड अस्पतालमा शुरुवातमै उपचार गराउन आउनेहरुको संख्या बढन थालेको र उपचारमा अत्यन्तै सजकता अपनाईएको दमक अस्पतालकी सूचना अधिकारी देवी दंगालले बताइन् ।

आर्थिक अवस्था कमजोर रहेका र उपचार गराउन नसकीरहेका दमकबासीहरुको निःशुल्क उपचार गराईने अस्पतालकी सूचना अधिकारी दंगालको भनाई छ । अहिले दमक नगरपालिका क्षेत्रभित्र समेत निशेधाज्ञा जारी भएकोले सर्बसाधारण नागरिक घरमै बस्न बाध्य भएका छन् ।