थप चार सांसद संक्रमित

२३ बैशाख, काठमाडौं । वैशाख २७ गतेका लागि आह्वान भएको प्रतिनिधिसभा बैठक बस्नुअघि संसद सचिवालयले गरेको पीसीआरमा चारजना सांसद र दुईजना कर्मचारीमा पोजिटिभ रिपोर्ट आएको छ ।

संसद सचिवालयले जनाए अनुसार, अरुको भने नेगेटिभ आएको छ । आज पोजेटिभ रिपोर्ट देखिएकाहरुमा लक्ष्मणलाल कर्ण, रामबाबु यादव, नरमाया ढकाल र पार्वती डिसी चौधरी रहेका छन् । यसअघि एमाले कै झलनाथ खनाल, भानुभक्त ढकाल, जुली महतो संक्रमित भइसकेका थिए । यीलगायत अहिले प्रतिनिधिसभाका ११ जना सांसद कोरोनाबाट संक्रमित अवस्थामा रहेका छन् ।

वैशाख २७ गते प्रधानमन्त्री केपी ओलीले विश्वासको मत लिने प्रयोजनका लागि संसदको विशेष अधिवेशन बोलाइएको छ । अधिवेशन सुरु हुनुअघि सांसदहरुको पीसीआर परीक्षण गरिएको हो । बुधबार १२८ सांसद, कर्मचारी, पत्रकार, सुरक्षाकर्मी, मर्यादापालकसमेत ६०९ जनाको पीसीआर परीक्षण गरिएको थियो ।