अमेरिकामा बच्चाहरु जन्मिने दर ४ दशक यताकै कम

२३ बैशाख, एजेन्सी । अमेरिकामा बच्चाहरु जन्मिने दर ४ दशक यताकै कम भएको संघीय सरकारबाट सार्वजनिक तथ्यांकमा उल्लेख गरिएको छ । अमेरिकन महिलाहरुले बच्चा जन्माउने दर सन् १९७९ कै कम भएको देखिएको हो ।

सन् २०२० मा अमेरिकन महिलाहरुले ३६ लाख बच्चाहरु जन्माएको र गतबर्षको तुलनामा यो दर ४ प्रतिशतले कम भएको सीडीसीको तथ्यांकमा उल्लेख छ । अमेरिकामा कुल प्रजननमा १ दशमलव ६४ मा गिरावट भएको छ । सन् १९३० को दशकबाट सरकारले ट्रयाकिंग सुरु गरेयताको यो सबैभन्दा कम दर हो ।

आधारभूत सामाजिक र आर्थिक सिफ्टका कारण प्रजननमा ह्रास आएको जनसांख्यिकीयहरुले जनाएका छन् । सन् २००७ मा मन्दी सुरु हुनुभन्दा अगाडि अमेरिकामा बच्चा जन्मिने दर बृद्धि भएको थियो । तर आर्थिक मन्दीले बच्चाहरु जन्माउने दरमा पनि कम आएको जनाइएको छ ।

त्यसपछि अमेरिकाको अर्थतन्त्र सुदृढ बन्दै गएपनि बच्चा जन्मिनेदर भने सुदृढ हुन सकेन । ठूलो मन्दीपछि जन्मदरमा कहिले पनि बृद्धि हुन नसकेको युनिभर्सिटी अफ न्यु ह्याम्पशायरका बरिष्ठ डेमोग्राफर प्रोफेसर केनथ जोन्सनले बताएका छन् । आफूले महिलाको उमेरको ३० को दशकमा प्रजननमा बृद्धिका लागि कैयन बर्षसम्म कुरेपनि कहिलेपनि त्यस्तो हुन नसकेको उनले बताए ।

सन् २००७ देखि कम पजननका कारण ७६ लाख बच्चाहरु कम जन्मिएको प्रोफेशर जोन्सनको अनुमान छ । छुट्टै अर्को तथ्यांकमा गत डिसेम्बरमा बच्चा जन्मिने दरमा ७ दशमलव ७ प्रतिशतले गिरावट आएको छ । ४० देखि ४४ बर्षसम्मका महिलाहरुमा जन्मदर २ प्रतिशतले गिरावट आएको तथ्यांकमा देखिएको छ ।