देशभर ९ हजार ७० संक्रमित थपिए, ५४ जनाको मृत्यु

२३ बैशाख, काठमाडौं । पछिल्लो २४ घण्टामा देशभर ९ हजार ७० जना कोरोना संक्रमित थपिएका छन्। दैनिक संक्रमणमा यो संख्या अहिलेसम्मकै धेरै हो। २० हजार ३६७ जनाको पीसीआर विधिबाट नमुना परीक्षण गर्दा ८ हजार ९७० जना र ७७५ जनाको एन्टीजेन परीक्षण गर्दा १०० जनाको रिपोर्ट पोजेटिभ आएको हो।

सोही अवधिमा थप ५४ जना संक्रमितको मृत्यु भएको छ। हिजो सबैभन्दा बढी ५८ जनाको निधन भएको थियो। त्यसैगरी २ हजार ७०७ जना भने निको भई घर फर्किएका छन्। अहिले निको हुने दर ७९.४ प्रतिशत छ।

थप संक्रमितसँगै देशभर सक्रिय संक्रमितको संख्या ७२ हजार ५६१ पुगेको छ। देशभरका कोभिड अस्पतालका आईसीयूमा ६२५ र भेन्टिलेटरमा २०१ जना उपचाररत छन्। नेपालमा हालसम्म कोरोना संक्रमणबाट मृत्यु हुनेको संख्या ३ हजार ५२९ पुगेको छ।