जसपा विभाजनका लागि अध्यादेश ल्याउने तयारी, प्रधानमन्त्रीले बोलाए बैठक  

२५, बैशाख, काठमाडौं । प्रधानमन्त्री केपी शर्मा ओलीले  मन्त्रिपरिषद्को आकस्मिक बैठक आव्हान गरेका छन् । प्रधानमन्त्री ओलीले आज साँझ ५ बजेका लागि मन्त्रिपरिषद्को बैठक बोलाएका हुन । प्रधानमन्त्रीको सरकारी निवास वालुवाटारमा साँझ ५ बजे बस्ने मन्त्रिपरिषद बैठकका  एजेण्डा बारे मन्त्रीहरुलाई जानकारी गराइएको छैन । एजेण्डा नखुलाइएका कारण केही महत्वपूर्ण निर्णयका लागि बैठक बोलाइएको हुनसक्ने एक मन्त्रीले बताए ।

प्रधानमन्त्री ओलीलाई विश्वासको मत दिन साथ दिने बताउँदै आएका जनता समाजवादी दलमा महन्थ ठाकुर  यतिवेला अल्पमतमा परेका छन् । निश्चित प्रतिशत नपुग्दा उनले दल विभाजन गर्न नमिल्ने र उनीमाथि उपेन्द्र यादवले कारवाही गर्न सक्ने जोखिम बढेपछि  ठाकुरलाई दल विभाजन गर्न सहज पार्न दल विभाजन सम्वन्धी अध्यादेश ल्याउन प्रधानमन्त्री ओलीले बैठक बोलाएको हुन सक्ने आकलन गरिएको छ । तर उनले त्यो अध्यादेश ल्याउँदा उनकै दलका माधव नेपाल पक्षलाई थप सजिलो हुने विश्लेषण गरिएको छ ।

प्रधानमन्त्री ओलीलाई विश्वासको मत लिन सघाउने आश्वसन दिएका जसपा नेता ठाकुरका सारथी  राजेन्द्र महतो पछिल्लो समय  जसपा संसदीय दलको नेताको रुपमा  ठाकुरले दावी पेश गरेपछि नेता ठाकुरसँग रुष्ट बनेका छन् ।  संसदीय दलको नेतामा ठाकुर आफैले दावी गरेपछि नेता महतो उपेन्द्र यादवको कित्तामा पुगेका कारण ठाकुरसँग दल विभाजनका लागि आवश्यक संख्या पनि नपुग्ने र पार्टी निर्णय उल्घनङ्ग गरेमा उनीमाथि पार्टीले कारवाही गर्न सक्ने भनि समाचारहरु बाहिर आएका छन् ।