विश्वासको मत नपाए पनि पुन: प्रधानमन्त्री बन्ने रणनीतिमा ओली

२६ बैशाख, काठमाडौ । नेकपा एमालेमा माधवकुमार नेपाल र झलनाथ खनाल पक्षका सांसदहरुले सामूहिक राजीनामा दिने तयारी गरिरहँदा प्रधानमन्त्री एव एमाले पार्टी अध्यक्ष केपी शर्मा ओलीले विश्वास मत नपाए  पनि प्रधानमन्त्री पदमा रहिरहन नयाँ रणनीति बनाएका छन् ।

नेपाल पक्षका सांसदले समूहिक राजीनामा दिएमा संसदमा विश्वासको मत नपाउने निश्चित भएपछि प्रधानमन्त्री पदमा रहिरहन उनले नयाँ रणनीतिमा तयार गरेका हुन । विश्वासको मत नपाएको अवस्थामा ओलीले प्रधानमन्त्री पदबाट राजीनामा दिने र त्यसलगत्तै राष्ट्रपति विध्यादेवी भण्डारीले ओलीलाई  नै पुन: प्रधानमन्त्री नियुक्ती गर्ने तयारी भइरहेको छ । प्रधानमन्त्री ओलीले भोली संसदमा विश्वासको मत लिदैछन् ।

प्रधानमन्त्रीले विश्वासको मत नपाएपछि राजीनामा गर्ने र प्रधानमन्त्रीले राजीनामा दिएपछि गठबन्धन सरकार गठनका लागि राष्ट्रपतिले आग्रह गर्नुपर्ने हुन्छ । तर त्यसो नगरी सिधै संविधानको धारा ७६ को ३ अनुसार संसदमा सबैभन्दा ठुलो दलको संसदीय दलको नेता प्रधानमन्त्री बन्ने प्रावधान अनुसार राष्ट्रपतिले पुन ओलीलाई प्रधानमन्त्री नियुक्ति गर्ने गरी तयारी भइरहेको बताइएको छ ।

धारा ७६ (३) लाई टेकेर पुन प्रधानमन्त्री बन्ने विषयमा प्रधानमन्त्री ओलीले राष्ट्रपतिसँग पटक पटक छलफल गरिसकेका छन्  । प्रधानमन्त्री ओलीका  कानून ब्यवसायीहरु एवम् सल्लाहाकारहरुले  संविधानको धारा ७६  (१) र (२) अनुसार सरकार पहिले नै बनेकोले अब बन्ने सरकार ७६ (३) अनुसार सिधै राष्ट्रपतिले  उनैलाई प्रधानमन्त्री नियुक्त गर्न सक्ने सल्लाह दिएका छन् ।  त्यसले पनि ओली नेपाल पक्षको चेतवानीमा कुनै टसमस नभएको , पार्टीमा सहमतिको प्रयास नगरेको एमाले नेताहरुले बताएका छन् ।

त्यसो त नेपाल पक्षका सांसदले राजीनामा दिनासाथ प्रधानमन्त्री ओलीले विश्वासको मत लिँदा बहुमत नपाउने निश्चित हुन्छ।  प्रमुख प्रतिपक्षी नेपाली कांग्रेस र माओवादी केन्द्रले उनलाई विश्वासको मत नदिने निर्णय गरिसकेका छन् । संविधान अनुसार त  बहुमत नपाउनासाथ ओलीले प्रधानमन्त्री पदबाट राजीनामा दिनुपर्ने हुन्छ।

त्यसपछि पुन नयाँ सरकार गठनका लागि राष्ट्रपतिले आव्हान गर्नुपर्ने हुन्छ । राष्ट्रपतिसँगको मिलोमतोमा राजीनितक ट्रयाक बाहिर लाने खेल हुन सक्ने आशका राजनीतिक वृतमा गरिएको छ । लुम्विनी प्रदेशको घटनाक्रमले यसको संकते गरेको छ ।

त्यसो त  नेपाल पक्षका २७ सांसदलाई कारवाही गर्ने भन्दै ओलीले यसअघि नै यसै पनि स्पष्टीकरण मागेका छन् । उनीहरूलाई कारबाही गरी सांसद पदबाट बर्खास्त गर्न सक्ने आकलन गरिए पनि विश्वासको मत लिने बेला आफैं अल्पमतमा पर्ने भएकाले अहिलेसम्म कारबाही प्रक्रिया अघि बढाएका छैनन्।

२०७५ जेठ २ गतेको अवस्थामा फर्काउन अध्यक्ष ओली तयार नभए आज साँझ वा भोलि  बिहानसम्म सामूहिक राजीनामा दिने तयारी नेपाल पक्षका सांसदले गरेपछि प्रधानमन्त्री ओली एकपछि अर्को विकल्पको खोजीमा देखिएका छन्।