नेपाल पक्षका २० सांसदले गरे राजीनामा पत्रमा हस्ताक्षर,अविश्वासको प्रस्ताव दर्ताको तयारी

२६ बैशाख, काठमाडौं । एमालेमा माधवकुमार नेपाल पक्षका २० सांसदले राजीनामा पत्रमा हस्ताक्षर गरेका छन् । उनीहरुले आज दिउँसो राजीनामा दिने र आजै ओली विरुद्ध अविश्वासको प्रस्ताव दर्ता गर्ने विपक्षी गठबन्धनको तयारी रहेको छ ।

सहमतिको प्रयास ओली कै कारण असफल भएको निश्कर्ष निकाल्दै नेपाल पक्षका सांसदहरु राजीनामा दिने निर्णयमा पुगेका हुन । एमालेलाई एकता पूर्वको अवस्थामा पुर्याउने माधव नेपालको मागमा ओली टसमस नभएपछि एकताको सम्भावना टरेको निश्कर्ष निकाल्दै राजीनामा दिन लागिएको हो ।

नेपाल पक्षका २० सांसदले शनिवार साँझ नै सांसद पदबाट राजीनामाको पत्रमा हस्ताक्षर गरी माधव नेपाललाई बुझाएका छन् । यसरी राजीनमा बुझाउनेहरुमा भीम रावल, युवराज ज्ञवाली, अष्टलक्ष्मी शाक्य लगायतका नेताहरु रहेका छन् ।

नेपाल पक्षका सांसदको राजीनामापछि आजै ओली विरुद्ध अविश्वासको प्रस्ताव लैजाने तयारी भइरहेको छ । राजीनामा पछि विपक्षी गठवन्धनको संयुक्त बैठक बसी अविश्वासको प्रस्ताव दर्ता गरिने छ । अहिले जनता समाजवादी दलका नेताहरुले कांग्रेस सभापति देउवासँग भेटवार्ता गरिरहेका छन् ।