महन्थ र राजेन्द्र बूढानिलकण्ठमा

२६ बैशाख, काठमाडौं । विश्वासको मत लिने सन्दर्भमा प्रधानमन्त्री केपी ओली अल्पमतमा पर्ने सम्भावना प्रबल भएपछि जनता समाजवादी पार्टीका अध्यक्ष महन्थ ठाकुर र वरिष्ठ नेता राजेन्द्र महतो अफ्ठेरोमा परेका छन् ।

प्रधानमन्त्री ओलीलाई समर्थन गर्ने तयारी गरिरहेको यो समूह सत्तारुढ एमाले कै रडाकोले गर्दा सरकार ढल्ने अवस्था निर्माण भएपछि नयाँ रणनीति बनाउनेतिर लागेको छ ।

यही प्रयोजनका लागि अहिले ठाकुर र महतो प्रमुख प्रतिपक्षी दल नेपाली कांग्रेसका सभापति शेरबहादुर देउवालाई भेट्न बूढानिलकण्ठ पुगेका छन् ।

बदलिएको परिवेशमा नेपाली कांग्रेससँग मिलेर जान उनीहरुको प्रयास रहेको देखिन्छ । जसपा निकट स्रोतका अनुसार, महन्थ– राजेन्द्र अब भने तटस्थ बसेर अर्ली इलेक्सनको वातावरण बनोस् भन्ने चाहन्छन् । त्यसका लागि कांग्रेसले समेत सहयोग गर्नुपर्ने उनीहरुको धारणा रहने बताइएको छ ।

तर नेपाली कांग्रेसले भने ओली विरुद्ध अविश्वास प्रस्तावमा मतदान गर्ने र नयाँ सरकार बनाउन पहल गर्ने निर्णय गरिसकेको छ । यही विषयमा थप छलफल गर्न जसपा नेताहरु बूढानिलकण्ठ पुगेको बताइएको छ ।

कदाचित ओली सरकार ढल्ने नै अवस्था आउँदा आफूहरु पनि साथमा रहने आशय समेत उनीहरुले राख्ने बुझिएको छ । ओली विरुद्ध साथ नदिएपनि नयाँ सरकार बन्ने अवस्था आयो भने चाहिं देउवालाई समर्थन गर्ने प्रस्ताव उनीहरुले राख्नेछन्–स्रोतले भन्यो ।