माधवका दुई सांसद ओली पक्षमा

२६ बैशाख, काठमाडौं । प्रधानमन्त्रीलाई विश्वासको मत दिनुभन्दा सामूहिक राजीनामा गर्ने माधव नेपाल समूहको भनाई सौदाबाजी मात्र रहेको भन्ने एमाले संस्थापन पक्षको आरोप सत्स साबित हुने देखिएको छ । किनभने नेपाल पक्षकै कतिपय सांसदहरुले राजीनामा नदिने प्रतिक्रिया दिन थालेका छन् ।

दाङबाट समानुपातिक सांसद गंगा चौधरीले पार्टी एकताका लागि मात्रै आफू सक्रिय हुने भन्दै विभाजनका लागि राजीनामा नदिने प्रतिक्रिया दिएकी छन् । उनले नेताहरुको निजी स्वार्थको सति नजाने भन्दै पार्टीको मूलधारमै रहने बताएकी छन् ।

उता, दैलेखबाट निर्वाचित नेपाल पक्षका राजबहादुर बुढाले पनि अहिल्यै सामूहिक राजीनामा दिने बेला भइनसकेको बताएका छन् । नेताहरुले अन्तिम घडीमा पार्टी एकता जोगाउने उनको विश्वास छ ।  उनले भने–भोलि १२ बजेसम्म समय बाँकी छ, त्यो भन्दा अगाडि कुनै अप्रिय निर्णयमा पुग्नु बुद्धिमानी होइन ।

नेपाल पक्षका यी दुई भनाइले ओलीको आरोप पुष्टि भएको छ– बालुवाटार निकट स्रोत भन्छ । भोलि १२ बजेसम्म हेरौं भनेको बार्गेनिङ मात्रै हो– उनले भने । जे भनेपनि अन्त्यमा माधव कम्रेडहरुले प्रधानमन्त्रीकै पक्षमा भोट हाल्ने हो, हेर्दैै गरौं – स्रोतको प्रतिक्रिया छ ।