माधव समुहको ओली पक्षसँग अन्तिम वार्ता चल्दै

२६ बैशाख, काठमाडौं । प्रधानमन्त्रीसमेत रहेका एमाले अध्यक्ष केपी ओली असन्तुष्ट नेता माधवकुमार नेपालले उठाएका माग संबोधन गर्न तयार नभएपछि परिस्थिति जटिल भएको छ ।  नेपाल पक्षीय कतिपय सांसदहरुले राजीनामापत्र नै बुझाइसकेका छन् भने केहीले राजीनामा नगर्ने टिप्पणी गरेका छन् ।

अहिले २२ जना सांसद राजीनामा गर्न तयार रहेको र सोही अनुरुप आफूहरुले नेता नेपाललाई पत्र बुझाएको सांसद मेटमणि चौधरीले बताएका छन् । भोलि संसदमा बहुमत सिद्ध गर्न प्रधानमन्त्री ओलीले एमालेकै सांसदहरुलाई फकाउनु परिरहेको छ ।

नेता नेपाल भने ओली पक्षसँग अन्तिम वार्ता गर्न भन्दै पूर्वसभामुख सुभाषचन्द्र नेम्बाङ र अर्थमन्त्री विष्णु पौडेलसँग अहिले छलफल गर्दैछन् ।संसद सचिवालयमा तीन नेता छलफलमा जुटेका छन् ।

ओलीले भने नेता नेपालले राजीनामा गर्ने भनेर धम्क्याएकाले वास्ता नगर्ने भन्दै आएका छन् । हामीले धम्क्याएको भन्ने ओलीको बुझाई गलत र भ्रम सिर्जना गर्ने मात्र हो भन्दै सांसद चौधरीले भने आवश्यक परे जस्तोसुकै त्याग गर्न तयार रहेको बताए ।