जसपाले सांसदहरुलाई ह्वीप लगाएन, तटस्थ बस्ने वा विपक्षीमा मत हाल्न पाउँने

२६ बैशाख, काठमाडौं । जनता समाजवादी दल ‘जसपा’ले प्रधानमन्त्री केपी शर्मा ओलीलाई विश्वासको मत दिने विषयमा आफना सांसदहरुलाई स्वविवेकको अधिकार प्रयोग गर्न पाउने निर्णय गरेको छ । यस निर्णयसँगै प्रधानमन्त्री केपी शर्मा ओलीले विश्वास मत हासिल गर्ने संभावना सकिएको छ ।

प्रधानमन्त्री केपी शर्मा ओलीलाई सहयोग गर्न बताउँदै आएका जसपाका नेता महन्थ ठाकुर र राजेन्द्र महतो समुह नै तटस्थ बस्ने निर्णय गरेसँगै प्रधामन्त्रीले विश्वासको मत पाउने संभावना सकिएको हो ।

आज बसेको जसपाको पदाधिकारी बैठकले सांसदहरुलाई ह्वीप नलगाउने निर्णय गरेको छ । कार्यकारिणी समितिमा बाबुराम–उपेन्द्र पक्षको बहुमत देखिएपछि महन्थ–राजेन्द्र पक्षले तटस्थ बस्ने प्रस्ताव अघि सारेका थिए ।  तर त्यसलाई संच्याउँदै उपेन्द्र यादवले स्वविवेक प्रयोग गर्न पाउने निर्णण गराएका छन् ।

यो निर्णयसँगै जसपा सांसदहरुले स्वविवेक प्रयोग गर्न पाउने भएका छन् । यो निर्णयसँगै जसपाका सांसदहरु कि तटस्त बस्नु पर्छ या विपक्षमा मतदान गर्नुपर्ने भएको छ ।

तर उपेन्द्र यादव पक्ष प्रधानमन्त्री ओलीको विरुद्ध उभिने बताउँदै आएको छ। आजको निर्णयबाट ठाकुर र महतो समेत तटस्थ रहने भएका छन् । यो विषय प्रधानमन्त्री केपी शर्मा ओली र कांग्रेस सभापति शेरबहादुर देउवालाई विहान नै जानकारी गराएका थिए । यादवको पक्षमा दुई दर्जनभन्दा बढी सांसदहरु रहेका छन् ।