माधव पक्षको निर्णयपछि ओलीको आह्वान

२७ वैशाख, काठमाडौं । माधव नेपाल पक्षका सांसद्हरुले आजको संसद बैठकमा अनुपस्थित रहने निर्णय लिए लगत्तै प्रधानमन्त्री केपी ओलीले हतारोमा कुनै अनुचित निर्णय नलिन ध्यानाकर्षण गराएका छन् ।

असन्तुष्ट खेमाका सांसद्हरुलाई संकेत गर्दै प्रधानमन्त्री ओलीले सोमबार बिहान सामाजिक सञ्जालमार्फत छलफलका लागि आह्वान समेत गरेका हुन् । आपसी मतभेद र असन्तुष्टी भए आपसी छलफलबाट समाधान गर्न सकिने भन्दै हतारोमा कुनैपनि अनुचित निर्णयमा जान बाञ्छनीय नहुने प्रष्ट पारेका छन् ।

साथै, आज १ बजे हुने मतदानमा सबैलाई पक्षमा मत हाल्नसमेत उनले ध्यानाकर्षण गराएका छन् । यसअघि नेकपा माधव समूहका २२ जना सांसद्हरु भेला भई पदबाट राजीनामा दिने सम्बन्धमा छलफल गरेका थिए ।

छलफलमा भएको सहमति अनुसार, आजको बैठकमा सहभागी पनि नहुने र राजीनामा पनि नदिने सहमति भएको छ । यसबारे नेता भीम रावलले सञ्चारकर्मीलाई बताएका थिए । ओलीको आह्वान लगत्तै माधव पक्षका दुई जना सांसद् भने बैठक हलबाट बाहिरिएका थिए ।