विभाजनको संघारमा जसपा: यादव र ठाकुर अलग-अलग बाटोमा

२८ बैशाख,काठमाडौं । जनता समाजवादी पार्टी ‘जसपा’भित्र नयाँ सरकार गठन र सत्ता  गठबन्धन निर्माणलाई लिएर पार्टी अध्यक्षद्वय उपेन्द्र यादव र महन्थ ठाकुर अलग अलग बाटोमा लागेपछि पार्टी विभाजन निश्चित बेनेको छ ।

पार्टीका अध्यक्ष यादवले गठबन्धन सरकार आब्हानका लागि नेपाली कांग्रेस र नेकपा माओवादी केन्द्रसँगै गठबन्धन निर्माणको कसरतमा रहँदा अर्का अध्यक्ष ठाकुरले वैकल्पिक सरकार बनाउन खोज्नु मधेश विरोधी काम भएको प्रतिक्रिया दिएका छन् ।

अध्यक्ष ठाकुरले विज्ञप्ती जारी गर्दै जनता समाजवादी पार्टी नेपालका नयाँ सरकार गठन आफ्नो पार्टीको प्राथमिकता नरहेको धारणा सार्वजनिक गरेका हुन । ठाकुरले ओली सरकारले जसपाका माग पूरा गरिरहेको बताएका छन् । यस्तो अवस्थामा सरकार बनाउने गतिविधिमा संलग्न हुनु मधेशको भावना विरोधी काम भएको समेत  बताएका छन् । उनले जसपा सरकार केन्द्रित नभई मुद्दा केन्द्रित रहेकोसमेत बताएका छन्।

यसरी एकपक्ष सरकार गठनमा लाग्नु अर्को पक्ष मध्यावधि निर्वाचन गराउने ओलीको चाहानमा सहयोग गर्दै जानुले जसपा विभाजनतर्फ गएको विश्लेषण गरिएको छ ।  सोमबार प्रतिनिधिसभामा विश्वासको मतमाथि मत विभाजन हुँदा पनि ठाकुर समूह तटस्थ बसेको थियो। यादव पक्ष प्रस्तावको विपक्षमा  मतदान गरेको थियो । उपेन्द्र यादवको पक्षमा १७ सांसद रहेका छन् भने ठाकुरको पक्षमा १५ सांसद रहेका छन् ।