डीआईजी र एसपीको नाममा बालुवा र गिट्टी तस्करीको लाईन दिएर रकम असुल्दै थापा

२८ बैशाख, बीरगञ्ज । पर्साको ग्रामीण भेग पटेर्वासुगौली गाँउपालिकाबाट पुनः गिटी र बालुवाको तस्करीमा वृद्धि भएको छ । पटेर्वासुगौली स्थित पथरैया प्रहरी चौकीका ईन्चार्ज रामकाजी थापाको मिलोमतोमा भलुआही खोलाबाट गिटी र बालुवाको व्यापक तस्करी भइरहेको स्थानीयले बताएका छन् ।

लकडाउन भएपनि इलाका प्रहरी कार्यालय पटेर्वा सुगौलीका प्रहरी निरीक्षक थापाले घुमुवा परिचालन गरि पर्साको ग्रामीण भेगमा रहेको मानवा, बडहनियार ,एकटंगा ,रङ्गपुर ,पथरैया लगाएतका बजारहरु अवैध रुपले संचालन गरी मदिरा भट्टीका पसलहरुबाट समेत रकम असुल्ने गरेको नाम नछाप्ने शर्तमा एक पसल संचालकले बताएका छन् ।

प्रहरी निरीक्षक थापाले ठेकेदारसँग मोटो नजराना बुझी तस्करीको लाईन खुल्ला गरेको स्थानीयले आरोप लगाएका छन् । अवैध उत्खन्न र गिटी बालुवाको संरक्षणको जिम्मा पाएको सुरक्षाकर्मी नै गिटी र बालुवा तस्करलाई सहयोग गर्न थालेको देखेर स्थानीय चकित बनेका छन् ।

दिनँहु दर्जन भन्दा बढी ट्याक्टरले भलुआही खोलाबाट अवैध रुपमा गिटी र बालुवा उत्खन्न गरेर लगेपनि प्रहरी चौकी मौन बसेको एक स्थानीयले बताए । स्थानीयले ठेकेदार र प्रहरी निरीक्षक थापाको मिलेमतोमा नै बालुवा र गिटीको तस्करीमा वृद्धि भएको हो ।

त्यसैगरि पर्साको ईलाका प्रहरी पटेर्वा सुगौलीको संरक्षणमा अहिले तीब्र रुपमा लागुऔषध र भैसी लगायतका अवैध सामानहरुको तस्करी भइरहेको छ । यस्ता गतिविधितर्फ संबन्धित निकायको ध्यान जान यति आवश्यक देखिएको छ।