बैंकर निरज श्रेष्ठको संक्रमणका कारण मृत्यु

२९ बैशाख, काठमाडौं । बैंकर निरज श्रेष्ठको कोरोना भाइरस संक्रमणका कारण मृत्यु भएको छ । उनको बुधबार बिहान ११ बजे नेपाल प्रहरी अस्पताल महाराजगन्जमा मृत्यु भएको अस्पतालले जनाएको हो ।

उनका बुबाको पनि मंगलबार राति कोरोनाकै कारण मृत्यु भएको थियो । श्रेष्ठ केही दिनअघि कोरोना संक्रमण भएपछि अस्पताल भर्ना भएका थिए  । स्वास्थ्य अवस्था सुध्रिएपछि उनले आफ्नो बेड अरुलाई दिन भनेका थिए ।  उनलाई संक्रमणले फेरि च्याप्यो तर अस्पतालमा बेड पाएनन् । श्रेष्ठ माछापुच्छ्रे बैंक हुँदै केही दिन सनराइज बैंकको सीईओसमेत भएका थिए । सनराइजमा सञ्चालक समितिमा विवाद भएपछि उनले राजीनामा दिएका थिए ।

तत्कालिन ग्रीनलेज बैंकबाट बैकिङ करिअर सुरु गरेका उनले एनआइसी एसिया र ग्लोबल आइएमई बैंकमा पनि काम गरेका थिए । श्रेष्ठका श्रीमती र एक छोरी छन् । तर उनीहरु दुवै नयाँ दिल्ली पुगेको र कोरोना संक्रमण देखिएकोले उतै अड्किएका छन् ।