सेतीमा थप तीन संक्रमितको मृत्यु, २७३ संक्रमण

२९ बैशाख, धनगढी । कोरोना भाइरसको संक्रमणबाट सेती प्रादेशिक अस्पतालमा उपचाररत थप तीनजना कोरोना संक्रमितको मृत्यु भएको छ । पछिल्लो २४ घण्टामा थप तीनजना संक्रमितको मृत्यु भएको हुन् । उनीहरु सबै धनगढीकै बासिन्दा हुन् ।

कोरोनाबाट मृत्यु हुनेमा धनगढी उपमहानगरपालिका–३ का ५० वर्षीय पुरुष, वडा नम्बर ३ कै ५४ वर्षीय पुरुष र वडा नम्बर १२ की ३५ वर्षीया महिला रहेका छन् । पछिल्लो २४ घण्टामा अस्पतालमा उपचाररत ११ जना कोरोना संक्रमण मुक्तभएर घर फर्किएका छन् भने थप ५ जना भर्ना भएका छन् ।

यस्तै अस्पतालको प्रयोगशालामा गरिएको परीक्षणमा थप २ सय ७३ जनामा कोरोना संक्रमण पुष्टि भएको छ । ५ सय ६४ जनाको नमुना परीक्षण गर्दा धनगढी उपमहानगरपालिकाका ४४ जना, कैलालीकै अन्य स्थानीय तहका २ सय ६ जना र विभिन्न जिल्लाका २३ जनामा संक्रमण पुष्टि भएको छ । सेती प्रादेशिक अस्पतालमा अहिले ४७ जना कोरोना संक्रमितको उपचार भइरहेको छ ।