वैकल्पिक सरकार बन्न नदिने चाला, राजेन्द्र महतो बूढानीलकण्ठमा

३० बैशाख, काठमाडौं । वैकल्पिक सरकार निर्माणको समयसीमा घक्र्याउन नेकपा एमाले ओली पक्ष र जनता समाजवादी पार्टी महन्थ पक्षको षडयन्त्र सुरु भएको छ ।

प्रधानमन्त्री केपी ओली पदमुक्त भएपछि संविधानको धारा ७६(२) बमोजिम गठबन्धन सरकार बनाउन राष्ट्रपति विद्यादेवी भण्डारीले दिएको समयसीमा आज साँझ सकिंदैछ । त्यसलाई अल्मल्याउन प्रधानमन्त्री केपी ओली र जसपा अध्यक्ष महन्थ ठाकुर सक्रिय भएका छन् ।

यसैक्रममा ओलीले आजै आफू पक्षको स्थायी कमिटी राखेर माधव नेपाल, भीम रावल, सुरेन्द्र पाण्डे र घनश्याम भूषालमाथिको कारबाही फुकुवा गरेका छन् । उता, महन्थले आफू पक्षीय नेता राजेन्द्र महतोलाई कांग्रेस सभापति शेरबहादुर देउवालाई अल्मल्याउन बूढानीलकण्ठ पठाएका छन् ।

अहिले महतो देउवा निवास पुगेका छन् । उनले महन्थ ठाकुरलाई प्रधानमन्त्री स्वीकारे आफूहरु वैकल्पिक सरकार दिन तयार भएको सन्देश देउवालाई दिन गएको बुझिएको छ । यसका लागि गृहकार्य गर्न पर्याप्त समय नभएकाले तत्काल त्यस्तो निर्णय देउवा एक्लैले लिन सक्ने अवस्था छैन ।

तर समय भने घर्किसकेको छ । त्यसैले यो सबै ओलीलाई नै अल्पमतको प्रधानमन्त्री बनाउने चाला मात्र भएको ठम्याई कांग्रेसजन र माधव पक्षको रहेको छ ।