उच्च शेयरमूल्य भएको राष्ट्रिय बीमा कम्पनीको मुनाफा ४९ प्रतिशतले घट्यो

३१ वैशाख, काठमाडौं । चालु आर्थिक वर्षको तेस्रो त्रैमाससम्ममा राष्ट्रिय बीमा कम्पनीको मुनाफा ४९.४७ प्रतिशतले घटेको छ । तेस्रो त्रैमाससम्म कम्पनीको बीमाशुल्क बढेपनि मुनाफा भने घटेर २७ करोड १२ हजार रुपैयाँमा सिमित भएको हो ।

गत आर्थिक वर्षको यसै अवधिमा कम्पनीको मुनाफा ५३ करोड ४३ लाख रुपैयाँ रहेको थियो ।यस अवधिमा कम्पनीको खुद बीमाशुल्क भने १०.८५ प्रतिशतले बढेर १९ करोड ३७ लाख रुपैयाँ पुगेको छ । गत आर्थिक वर्षको यहि अवधिमा कम्पनीले १७ करोड ४७ लाख रुपैयाँ खुद बीमाशुल्क आर्जन गरेको थियो ।

कम्पनीको खुद बीमाशुल्क बढेपनि अन्य आम्दानी घटेपनि मुनाफामा संकुचन देखिएको हो । कम्पनीको लागनी कर्जा तथा अन्य आय ३८.८० प्रतिशतले घेटर १० करोड ५५ लाख रुपैयाँमा झरेको छ । गत आर्थिक वर्ष कम्पनीको यस्तो आम्दानी १७ करोड २४ लाख रुपैयाँ रहेको थियो ।

यस्तै कम्पनीले पुनर्बीमा कमिशन वापत १३ करोड ७८ लाख रुपैयाँ आम्दानी गरेको छ । चुक्ता पूँजी २६ करोड ६६ लाख रुपैयाँ रहेको कम्पनीको जगेडा कोषमा ३ अर्ब १० करोड रुपैयाँ, बीमा कोषमा २ अर्ब ३८ करोड रुपैयाँ सञ्चित छ ।

यस अवधिसम्ममा कम्पनीले ३९ हजार ६२८ वटा बीमालेख जारी गरी १ अर्ब ३७ करोड ६३ लाख रुपैयाँ कुल बीमाशुल्क आर्जन गरेको छ भने ८ हजार ७२१ वटा दाबी वापत १४ करोड ७४ लाख रुपैयाँ भुक्तानी गरेको छ ।

कम्पनीको वार्षिक प्रतिशेयर आम्दानी १३५ रुपैयाँ २ पैसा, प्रतिशेयर नेटवर्थ १२६३ रुपैयाँ ८८ पैसा र मूल्य आम्दानी अनुपात १७७.८५ गुणा रहेको छ ।