जसपामा राजेन्द्र महतो संसदीय दलको नेता

३१ बैशाख, काठमाडौं । जनता समाजवादी पार्टी ‘जसपा’को महन्थ ठाकुर—राजेन्द्र महतो पक्षले महतोलाई एकपक्षीय रुपमा संसदीय दलको नेता चयन गरेको गरेको छ ।

ठाकुर— महतो पक्षका २० जना सांसदहरूको सहमतिमा महतोलाई संसदीय दलको नेता चयन गरेको महतो पक्षका सांसद प्रमोद साहले बताए । आइतबार संसद सचिवालयमा यस सम्बन्धमा जानकारी गराउने तयारी भएको पनि उनले जनाए ।

ठाकुर—महतो पक्षसँग १६ जना सांसद छन । उपेन्द्र यावद पक्षका अरु ४ जना सांसद आफ्नो कित्तामा आएको साहले दावी गरे । ‘अहिले हामीसँग २० जना सांसद हुनुहन्छ । अरू एकजना सांसदले पनि आउने प्रतिबद्धता जनाउनु भएको छ ।’ कित्ता परिवर्तन गरेका सांसदको नामबारेमा भने उनले खुलाउन चाहेनन । ठाकुर निकट नेता डा. सुरेन्द्र झाले पनि सहमतिमा महतोलाई संसदीय दलको नेता चयन गरिएको बताए ।

उपेन्द्र यादव पक्षका सांसद रामसहाय यादवले भने महतोलाई संसदीय दलको नेता चयन गरेको विषयमा आफूलाई कुनै जानकारी नभएको बताए । ‘कहिले संसदीय दलको बैठक बस्यो र कुन आधारमा महतोजी संसदीय दलको नेता चयन हुनु भयो । यसबारेमा मलाई थाहा छैन’ यादवले भने ।

ठाकुर महतो पक्षका सांसदहरूले बिहीबार भक्तपुरको डोलेश्वर रिसोर्टमा गई बैठक गरेका थिए । सो बैठकमा महतोलाई संसदीय दलको नेता चयन गर्ने सहमति भएको साहले बताए । पोहर साल तत्कालिन समाजावादी पार्टी र राष्ट्रिय जनता पार्टीबीच एकीकरण हुँदा महतोलाई संसदीय दलको नेता दिने मौखिक सहमति भएको ठाकुर निकट नेताहरू बताउँछन ।