चीनले प्रक्षेपण गरेको जुरोङ मंगल ग्रहमा सफल अवतरण

१ जेठ, एजेन्सी । चीनले प्रक्षेपण गरेको अन्तरिक्षयान जुरोङले मंगल ग्रहमा सफल अवतरण गरेको छ। शनिबार जुरोङले मंगल ग्रहको सतहमा सफल अवतरण गरेको चिनियाँ सञ्चारमाध्यमहरूले दाबी गरेका हुन्।

जुरोङलाई मंगल ग्रहको उत्तरी गोलार्द्धको उटोपिया प्लानिसिया क्षेत्रमा अवतरण गरिएको बताइएको छ। जुरोङको सफल अवतरणलाई चीनले उल्लेख्य उपलब्धि भएको उल्लेख गरेको छ। मंगल ग्रहमा सफलता हासिल गरेसँगै अब चीनले अमेरिकालाई चुनौती दिएको बीबीसीले जनाएको छ ।

हालसम्म अमेरिकी अन्तरिक्षयानले मात्र मंगल ग्रहको सतहमा अवतरण गरेका थिए।  योसँगै मंगल ग्रहमा अवतरण गर्ने चीन दोस्रो देश बन्न सफल भएको छ। मंगल ग्रह पृथ्वीको सहतभन्दा करिब ३२ करोड किलोमिटर टाढा छ। त्यहाँबाट पठाइएका रेडियो म्यासेस पृथ्वीसम्म आइपुग्न झन्डै १८ मिनेट लागेको थियो।

चीनले यस रोभरमा एक प्रोटेक्टिभ क्याप्सुल, एक प्यारासुट र रकेट प्लेफर्म प्रयोग गरेको छ । चिनियाँ वैज्ञानिक तथा इन्जिनियरहरुले यो मिसनका लागि लामो समयदेखि काम गर्दै आएका थिए ।

यदि चु रोङ्ग अन्तरिक्ष रोबोटले मंगल ग्रहबाट सूचना संकलन र तस्वीर पठाउन सक्यो भने यो सफलता हासिल गर्ने चीन अमेरिकापछिकै दोस्रो देश बन्ने छ । रुसले पनि सन् १९७१ मा मंगल ग्रहमा अन्तरिक्ष रोबोट पठाएको थियो तर सिग्नल टुटेपछि त्यहाँबाट कुनै पनि सूचना हासिल भएको थिएन ।