कविता: मुढा र शपथ

हेर्दा उस्तै उस्तै लागे,
लाश जलाउनका लागि
नदी किनारमा
चाङ लाएर राखिएका
दाउराका मुढाहरु
र,
शपथ खानका लागि
लाइन लागेकाहरु ।
फरक यत्ति थियो,
कसैलाइ मुक्ति दिन, मुढाहरु जलिरहे,
आफू मात्रै बाँच्न, लाइन लाग्नेहरुले,
तमाम दाउपेच खेलिरहे ।
हेर्दा उस्तै उस्तै लागिरहे,
नदी किनारका मुढाहरु
र,
शपथ खानका लागि लाइन लागेकाहरु ।
फरक यत्ति थियो,
मुढाहरु, एकतमास जलिरहे,
लाइन लाग्नेहरु, जलेको हेरिरहे
कोहि प्रतिज्ञा सहित
कोहि प्रतिज्ञा बेगर ।

मिति: २०७८/०१/३१
डिस्क्लेमरः म कुनै पनि राजनीतिक दलको सदस्य होइन ।

 जया लुईंटेलकाे फेसबुकबाट साभार