संघीय संसद भवन नयाँ बानेश्वरमा खोप लगाउने क्रममा तनाव भएपछि स्थगित !

२ जेठ, काठमाडौं । कोभिड १९ को भ्याक्सिन अभावको कारण आजको कोभिड १९ को दोस्रो चरणको खोप लगाउने कार्यक्रममा तनाव भएपछि स्थगित भएको छ । दोश्रो चरणको खोप लगाउने विषयमा संघीय संसद भवन नयाँ बानेश्वरमा तनाव भएको हो ।

संघीय संसद सचिवालयको पहलमा जिल्ला जनस्वास्थ्य कार्यालय काठमाडौंले खोप लगाउने सिलसिलामा तनाव उत्पन्न भएको छ । संघीय संसदका सांसद, कर्मचारी, सुरक्षाकर्मी, पत्रकारका लागि राखिएको खोप कार्यक्रममा अन्य सरकारी निकायका कर्मचारी तथा उनीहरूका आफन्तहरू समेत खोप लगाउन आएपछि विवाद उत्पन्न भएको थियाे ।

लगाउन ल्याइएको खोप संख्याभन्दा उल्लेख्य रूपमा भीड बढेको भन्दै जिल्ला जनस्वास्थ्य कार्यालय काठमाडौंले खोप लगाउन रोकेको छ । संसद सचिवालयले आजका लागि ८ सय डोज खोप मागेको भएपनि ३ सय डोज खोप मात्र ल्याइएको जनाइएको छ ।

सो ल्याएको खोप समेत जिल्ला जनस्वास्थ्य कार्यालय काठमाडौंका कर्मचारीले लगाउन मानिरहेका छैनन् । बिहानैदेखि लाइन बसेका सांसद तथा पूर्वमन्त्रीले समेत खोप लगाउन पाएका छैनन् ।

साथै लाइन बसेका अन्य व्यक्तिहरू खोप लगाउन नपाएपछि आक्रोशित बनेका छन् । संसद सचिवालयले २ दिन अघिदेखि सांसद कर्मचारी तथा मर्यादापालक तथा संसदीय रिपोर्टिङ गर्ने पत्रकारका लागि दोश्रो डोजको खोप लगाउने कार्यक्रम राखेको थियो ।

यता , सघीय ससद र सघीय ससद सचिवालयसंग सम्बन्धित छुट भएका सबै माननीय तथा कर्मचारी लगायत अन्य सबै सम्बन्धितहरूलाई सम्भब भएसम्म चाडै खोपको ब्यबस्थापन गरिने सासद सुबिधा ब्यबस्थापन शाखा, स्वास्थ्य इकाइले जनाएको छ ।