संसदबाट नीति कार्यक्रम पास नहुने र वैकल्पिक सरकार पनि नबन्ने देखियो: भट्टराई

४ जेठ, काठमाडौं । जनता समाजवादी पार्टी (जसपा) का संघीय परिषद अध्यक्ष तथा पूर्वप्रधानमन्त्री  डा. बाबुराम भट्टराईले  केपी शर्मा ओली  सरकारले नीति कार्यक्रम संसदबाट पास गर्न पनि नसक्ने र बैकल्पिक सरकार नबन्ने दिशामा मूलुक गएको बताएका छन् ।

एकातिर कोरोना महामारी र अर्कोतिर अन्त्यहीन राजनीतिक गतिरोधले देश गम्भीर संकटमा फस्‍न लागेको र संविधानका स्तम्भ एकाएक गरी ढल्दै जाने दिशातर्फ मूलुक प्रवेश गरेको टिप्पणी गरेका हुन ।

‘देश गम्भीर संकटमा फस्दैछ’ भट्टराईले सामाजिक सञ्जाल ट्‍वीटरमा लेखेका छन्, ‘एकातिर कोरोना महामारी र अर्कोतिर अन्त्यहीन राजनीतिक गतिरोध । ‘न ओली सरकारले नीति, कार्यक्रम र बजेट पास गर्न सक्छ । न वैकल्पिक सरकार बन्‍न । संविधानका स्तम्भ एकएक गरी ढल्दैछन् । सबै पार्टी, नेता निरीह । सर्पको मुखका भ्यागुता । अनि राष्ट्रिय एकताको कुरा गर्नु अपराध हुन्छ ? भट्टराईले ट्वीटरमा लेखेका छन् ।

जसपा  विभाजनको संघारमा पुगेको बेला जसपा नेता भट्टराईबाट आएको यस अभिव्यक्ति अर्थपूर्ण रुपमा हेरिएको छ ।