ओलीको शपथविरुद्ध परेका रिट प्रधानन्यायाधीश आफैंले हेर्ने

४ जेठ, काठमाडौं । प्रधानमन्त्री केपी ओलीले तेस्रो पटक पद तथा गोपनीयताको शपथ लिदा गरेको हर्कतविरुद्ध सर्वाेच्च अदालतमा परेको रिट उपर प्रधानन्यायाधीश चोलेन्द्रशमशेर राणाले आफ्नै इजलाश तोकेका छन् ।

पेशीमा प्रधानन्याधीश राणाको एकल इजलाशले आज सुनुवाई गर्दैछ । साथै, संघीय संसद्मा सदस्य नरहेका सातजना मन्त्रीको पुन नियुक्तिसमेत गैरकानूनी भन्दै रिट निवेदकले पदमुक्त गर्न माग गरेका छन् ।

यसरी रिट दायर गर्नेहरुमा वरिष्ठ अधिवक्ता चन्द्रकान्त ज्ञवाली, सन्तोष भण्डारी, नवराज अधिकारी र राजकुमार सुवाल रहेका छन् । रिटमा प्रधानमन्त्रीले शपथ लिंदा केही शब्द नै उच्चारण नगरी गर्न नपर्ने भनेकाले पुन: शपथ लिन माग गरिएको छ ।

गत वैशाख ३१ गते राष्ट्रपति विद्यादेवी भण्डारीले शपथ ग्रहण गराउँदा प्रधानमन्त्री ओलीले ‘प्रतिज्ञा गर्छु’ भन्ने शब्दावलीलाई ‘त्यो पर्दैन’ भनेर वाचन गरेका थिए ।