माधव नेपाललाई भेटन कोटेश्वर पुगे बादल

४ जेठ, काठमाडौं । सत्तारुढ नेकपा एमालेभित्र नयाँ नयाँ खेल प्रारम्भ भैरहँदा राष्ट्रियसभा सदस्यको उपनिर्वाचनमा उम्मेदवार रहेका गृहमन्त्री रामबहादुर थापा ‘बादल’ एमालेका वरिष्ठ नेता माधवकुमार नेपाललाई भेट्न भर्खरै उनको निवास कोटेश्वरमा पुगेका छन् ।

एमालेको ओली पक्षीय उम्मेदवार रहेका बादल आउँदो जेठ ६ गते हुने उपनिर्वाचनको सन्दर्भलाई लिएर नेता नेपाललाई भेट्न पुगेका हुन् । राष्ट्रियसभा उपनिर्वाचनमा थापाको प्रतिस्पर्धीमा माधव नेपाल समूहका डा. खिमलाल देवकोटा र नेपाल मजदुर किसान पार्टीका कृष्णबहादुर तामाङ रहेका छन् ।

देवकोटालाई माधव नेपाल पक्ष, नेपाली कांग्रेस, नेकपा माओवादी केन्द्र र जनता समाजवादी पार्टीले समर्थन गरेका छन् भने बादललाई एमालेको एउटा खेमा र राप्रपाले सर्मथन गरेको छ ।

बादल माओवादी केन्द्रको काररवाहीमा परि राष्ट्रियसभाको पद गुमाउने नेता हुन् । माओवादी जनयुद्धका संस्थापक मध्य पर्ने बादलले आफ्नै नेता प्रचण्डलाई धोका दिदै प्रधानमन्त्री केपी ओलीलाई साथ दिएका छन् ।