अविश्वास, असहयोग र अन्तरविरोध सिर्जना हुने काम नगर्न एमाले कार्यदलको आग्रह

४ जेठ, काठमाडौं । नेकपा एमालेको केपी ओली र माधव नेपाल पक्षबीच सहमति र समझदारी कायम गर्न गठित कार्यदलले एकआपसमा अविश्वास, असहयोग र अन्तरविरोध सिर्जना हुने काम कुराबाट अलग रहन पार्टी पंक्तिलाई आह्वान गर्ने निर्णय पारित गरेको छ ।

आज प्रधानमन्त्रीको कार्यकक्ष सिंहदरबारमा बसेको १० सदस्यीय कार्यदलको बैठकले सो निर्णय गरेको हो । पार्टी एकता र समझदारीलाई वृद्धि गर्न तथा पार्टीभित्र देखिएका समस्यालाई यथोचित रूपमा समाधान गर्दै पार्टी पंक्तिलाई एकताबद्ध रूपमा अघि बढाउन कार्यदलले सबैसँग सहयोग र सद्भावका लागि आग्रह गर्ने पनि निर्णय गरेको छ ।

त्यस्तै कार्यदलको कार्यक्षेत्र, कार्यविधि र आचारसंहिता बनाउने निर्णय पनि आजको कार्यदल बैठकले पारित गरेको छ । एमालेमा एउटै संगठन संरचना कायम गर्न कार्यविधि र कार्यसूची बनाइने भएको हो । कार्यविधि, कार्यसूची र आचारसंहिता तत्काल बनाएर लागू गरिने भएको छ । बैठक अर्को बुधवार फेरि बस्ने भएको छ ।

२ जेठमा अध्यक्ष केपी शर्मा ओली र वरिष्ठ नेता माधवकुमार नेपाल तर्फबाट पाँच-पाँच जना रहनेगरी दश सदस्यीय कार्यदल बनेको थियो।

कार्यदलमा आज भएको समझदारी