अब संक्रमितको शव व्यवस्थापनमा महिला सैनिक

५ जेठ, धनगढी । कोरोना संक्रमितको शव व्यवस्थापनमा अब महिला सैनिक खटिन थालेका छन् । यसअघि पुरुष सैनिक मात्रै खटिदै आएका थिए ।  आज कोरोना संक्रमित मृतकको शव व्यवस्थापनमा पहिलो पटक खटिएका महिला सैनिकको टोलीले धनगढीको गोदावरी आर्यघाटमा अन्तिम संस्कार गरेको हाे ।

कैलालीको अत्तरियास्थित भवानी दल गणले बुधबार पहिलो पटक उपसेनानी शशी केसीको नेतृत्वमा ६ जना महिला सैनिकहरुलाई संक्रमितको शव व्यवस्थापनमा खटाएको हो । उपसेनानी केसीको नेतृत्वमा खटिएका महिला सैनिकले सेती प्रादेशिक अस्पतालमा मृत्यु भएकी एक महिलाको शव गोदावरी आर्यघाटमा हिन्दु परम्पराअनुसार व्यवस्थापन गरेका हुन् ।

गणका गणपति प्रमुख सेनानी विकास केसीले महिला तथा बालबालिकाको शव व्यवस्थापनका लागि तालिमप्राप्त महिला सैनिक खटाइएको बताए । गणले शव व्यवस्थापन कार्यविधि ०७७ अनुसार बुधबारसम्म कैलालीमा मृत्यु भएका १ सय ६६ जनाको शव व्यवस्थापन गरेको जनाएको छ ।