९१ बर्षीया उपमेयरले जितिन कोरोना

६ जेठ,  वीरगञ्ज । कोरोनाका कारण मृत्यु र संक्रमण बढेको मात्रै खबर सुन्दा र हेर्दा दिक्क भएकाहरुका लागि खुसीको खबर–आज बिहान ९१ वर्षीया हजुरआमा शान्ति कार्की कोरोना जितेर घर फर्किइन्,त्यो पनि कुनै समस्या नै नपरी । कार्की सामान्य नागरिक मात्र होइनन्, स्थानीय निकायमा निर्वाचित सबैभन्दा बृद्धा महिलासमेत हुन् । उनी वीरगञ्ज महानगरपालिकाकी उपमेयर हुन् ।

दुई साताअघि रुघाखोकी र ज्वरोले जाँगेपछि उनको कोरोना परीक्षण गर्दा पोजेटिभ आयो । अनि उनी महानगरले नै सञ्चालन गरेको आइसोलेसन कक्षमा भर्ना भइन् । डाक्टरको नियमित निगरानीमा रहेकी कार्कीले खासै समस्या भोग्नु परेन । सामान्य खानपीन र आरामबाटै उनी कोरोना संक्रमणमुक्त भएकी छन् । आज बिहान उनको रिपोर्ट नेगेटिभ आएपछि घर गएकी छन् ।

उपप्रमुख कार्कीलाई घर लैजान नगर प्रमुख विजय सराबगी आफैं अस्पताल पुगेका थिए । वीरगञ्जमा आफ्नै घर समेत नरहेकी कार्की अविवाहित हुन् । उनी आफन्तकोमा बस्ने गरेकी छन् ।