अब नेपालीलाई पनि चार्टर्ड उडानबाट विदेश जान दिने

६ जेठ, काठमाडौं । सरकारले अबदेखि नेपाली नागरिक पनि चार्टर्ड उडानबाट विदेश जान पाउने भएकाे जनाएकाे छ । बुधबार बसेको मन्त्रिपरिषद बैठकले नेपालीलाई पनि चार्टर्ड उडानमार्फत विदेश जान अनुमति प्रदान गर्ने निर्णय गरेको हो।

पर्यटनमन्त्री भानुभक्त ढकालको सिफारिसमा नेपालीलाई पनि चार्टर्ड उडानबाट विदेश जान दिने र त्यस्ता उडानलाई अनुमति दिने निर्णय भएको नागरिक उड्डयन प्राधिकरणका प्रवक्ता राजकुमार क्षेत्रीले जानकारी दिए।

नियमित अन्तर्राष्ट्रिय उडान बन्द भएसँगै नेपालमा रहेका विदेशीलाई फिर्ता लिनका लागिमात्र चार्टर्ड उडान अनुमति दिइँदै आएको थियो। अब भने सरकारले नेपालीलाई पनि विदेश लिने उडानलाई चार्टर्ड अनुमति दिन नेपाल नागरिक उड्डयन प्राधिकरणलाई निर्देशन दिएको छ।

वैशाख २३ गतेदेखि भारत बाहेकका देशमा नियमित उडान बन्द भएसँगै नेपालीका लागि विदेश जान बन्द गरिएको थियो। यस्तै सरकारले चीनको ग्वाङजाउ र कतारको दोहामा हप्तामा एउटा नियमित उडान अनुमति दिने पनि निर्णय गरेको छ। तर त्यस्तो उडान यात्रु बोक्नका लागि नभई मेडिकल सामग्री आपूर्तिका लागि मात्र हुनुपर्ने छ।