आज विपक्षी गठवन्धन संसद विघटनविरुद्ध सर्वोच्च जाँदै 

१० जेठ, काठमाडौं । आवश्यक तयारी नपुगेको भन्दै हिजोका लागि रिट दर्ता थाती राखेका विपक्षी गठवन्धनले संसद विघटनविरुद्ध आज सर्वोच्च मुद्धादर्ता गर्ने  भएका छन् ।  विपक्षी गठबन्धनमा रहेका नेपाली कांग्रेस र माओवादी केन्द्र लगायत चार दल र एमालेको नेपाल खनाल समूहले प्रतिनिधिसभा विघटन असंवैधानिक भएको भन्दै रिट हाल्न लागेका हुन।

हिजो नै विपक्षी गठवन्धनले नै रिट लिएर सर्वोच्च अदालत जाने भनिए पनि तयारी नपुगेको भन्दै आजका लागि सारिएको थियो।  प्रधानमन्त्रीमा  शेरबहादुर देउवालई समर्थन गरेका बहुमत सांसदको हस्ताक्षरसहित सशरिर सर्वोच्च अदालतमा उपस्थित भएर रिट हाल्ने तयारी गरेका लागि दलहरुले  आइतबार नै सांसदहरुको नागरिकता व्याक्तीगत विवरण हस्ताक्षर लगायत संकलन गरेका छन् ।

आवश्यक प्रमाण संकलन र हस्ताक्षर र रिट निवेदन लेखन लगायतका सवै प्रकृया पुरा भएकाले आज विहान ११ बजे सम्म रिट निवेदन दर्ता गरिने कांग्रेस नेता गगन कुमार थापाले जनाकारी दिए ।

रिटमा संविधानको धारा ७६ (५) अनुसार प्रधानमन्त्री नियुक्तिका लागि नेपाली कांग्रेसका सभापति शेरबहादुर देउवाले १ सय ४९ सांसदको हस्ताक्षरसहित गरेको दावी वैधानिक रहेको उल्लेख गरिएको छ। देउवालाई प्रधानमन्त्री नियुक्तिका लागि परमादेश जारी गर्न पनि माग गरिएको छ।