देशमा आगामी चार सातामा कोरोना संक्रमण क्रमशः घट्दै जाने: त्रिपाठी

१० जेठ, काठमाडाैं ।  स्वास्थ्य तथा जनसंख्यामन्त्री हृदयेश त्रिपाठीले देशमा आगामी चार सातामा कोरोना भाइरस संक्रमण क्रमशः घट्दै जाने बताएका छन् । सोमबार दिउँसो मन्त्रालयमा पत्रकार सम्मेलनमा मन्त्री त्रिपाठीले यस्ताे बताएका हुन् ।

मन्त्री त्रिपाठीले पत्रकार सम्मेलनमा आवतजावतमा प्रभावकारी नियन्त्रणमा नआएको र केही सेवा सुचारु रहेकाले संक्रमण दर अपेक्षाकृत रुपमा नियन्त्रणमा आउन नसकेको बताएका छन् ।

वर्तमान अवस्थामा देशमा स्वास्थ्य संकट लगाउनुपर्ने विज्ञहरूको सुझावलाई मन्त्रालयले सकारात्मक रूपमा लिएको समेत पत्रकार सम्मेलनमा मन्त्री त्रिपाठीले बताए ।

पछिल्लो एक साताको तथ्यांक हेर्दा औसतमा दैनिक २० हजार नमुना परीक्षण गर्दा ८ हजार ३०० जनामा संक्रमण पुष्टि हुने गरेको छ । अहिले बी १.६१७.२ भेरियन्ट मुख्य रुपमा फैलिएको छ, जसलाई भारतीय भेरियन्ट पनि भनिन्छ ।