आज थप ६७१६ जनाले जिते कोरोना, १४५ संक्रमितकाे मृत्यु !

१२ जेठ, काठमाडौं । नेपालमा पछिल्लो २४ घण्टामा थप ६७१४ जनामा कोरोना भाइरस पुष्टि भएको छ । १९ हजार ३० जनाको पीसीआर गर्दा ६६७७ जनामा र ३२२ जनाको एन्टिजेन ३७ जनमा संक्रमणको पुष्टि भएको हो ।

यही अवधिमा थप ६७१६ जना निको भएका छन् भने थप १४५ जनाले ज्यान गुमाएका छन् । दोस्रो लहर सुरु भएयता नयाँ संक्रमितभन्दा निको हुनेको संख्या बढी भएको यो पहिलो भएको स्वास्थ्य मन्त्रालयले जनाएको छ ।

मंगलबार थप ८६३६ जनामा कोरोना भाइरस संक्रमण पुष्टि भएको थियो भने १६९ जनाको मृत्यु भएको थियो । यसअघि सोमबार देशभर ७४२५ जनामा कोरोना संक्रमण पुष्टि भएको थियो भने ७१३५ जना निको भएका थिए । यस्तै १८५ जनाले संक्रमणबाट ज्यान गुमाएका थिए ।

पछिल्लो २४ घण्टामा काठमाडौं उपत्यकामा १४९३ जनामा संक्रमण पुष्टि भएको मन्त्रालयले जनाएको छ । यसमध्ये काठमाडौंमा ११३९, ललितपुर २४१ र भक्तपुरमा ११३ जना संक्रमित थपिएका हुन् ।