संक्रमण घट्न थालेपछि जनजीवन सामान्य बनाउने प्रशासनको तयारी

१६ जेठ, काठमाडौं । कोरोना संक्रमणमा पछिल्ला केही दिनयता आएको कमीले गर्दा काठमाडौं उपत्यकाको जनजीवन अलि खुकुलो बनाउने सोच प्रशासनले बनाएको छ ।

राजधानी काठमाडौं उपत्यकालगायत देशभरिकै संक्रमण दर ओरालो लागेकाले जेठ २० गतेपछि जनजीवन सामान्य बनाउने तयारी प्रशासनले थालेको हो ।

काठमाडौंका प्रमुख जिल्ला अधिकारी कालीप्रसाद पराजुलीले संक्रमण विस्तारै घट्न थालेकाले सर्वसाधारणको जनजीवन खुकुलो बनाउने सोच रहेको बताए । जेठ २० पछि सामान्य जीवन बनाउने तयारी थालिएको उनले बताए । अब जेठ २१ बाट फेरि किरानालगायत पसलहरु खोलिने पनि उनले बताए ।

तर यसका लागि उपत्यकाका तीनवटै जिल्लाका प्रमुख जिल्ला अधिकारीहरुबीच बैठक गरेर निर्णय लिइने उनले बताए । अहिले भने जेठ २० गतेसम्म बिहान ९ बजेसम्म फलफुल र तरकारी पसल मात्र खोल्न दिइएको छ । असार लागेपछि भने जनजीवन पूरै सामान्य बनाउने तयारी प्रशासनको रहेको बुझिन्छ ।