पूर्व गृहमन्त्री ‘बादल’ र एमाले नेता खड्काका कारण राज्यको साढे दुई करोड स्वाहा !

१७ जेठ, काठमाडौं । पूर्व गृहमन्त्री एवम् राष्ट्रियसभा सदस्य रामबहादुर थापा ‘बादल’ र राष्ट्रियसभा सदस्य चन्द्र खड्काका कारण राज्यको  साढे दुई करोड रुपैयाँ स्वाहा भएको छ ।

एउटा दलबाट निर्वाचन जितेर अर्को दलमा प्रवेश गएका कारण यी दूई पूर्व माओवादी केन्द्रका सांसदको ठाउँमा पुन निर्वाचन गर्दा राज्यलाई साढे २ करोड बढी अतिरिक्त व्ययभार थापिएको हो ।

राजनीति दल सम्वन्धि ऐन अनुसार दल त्याग गरेपछि स्वत सांसद पदमुक्त हुने र ३५ दिन भित्र त्यसरी खाली भएका राष्ट्रियसभा सदस्य पदका लागि उपनिर्वाचन गर्नुपर्ने कानूनी बाध्यता रहेको छ ।

सोही बाध्यता अनुसार आयोगले बादलका कारण रिक्त भएको बागमती प्रदेशमा निर्वाचन सम्पन्न भइ नयाँ प्रतिनिधि समेत चयन भइसकेका छन् । त्यस्तै चन्द्र खड्काका कारण रिक्त भएको निर्वाचन क्षेत्रमा उक्त पदका लागि पदमा लुम्विनी प्रदेशको दाङ्गमा निर्वाचन भइरहेको छ । उनी आफै पुनः चुनावी प्रतिस्पर्धामा रहेका छन् । बादल भने विपक्षी गठबन्धनका साझा उम्मेदवार डा. खिमलाल देवकोटासँग पराजित भए ।

निर्वाचन आयोगका अनुसार उनीहरुका कारण खाली भएको राष्ट्रियसभाका दुई निर्वाचन क्षेत्रमा उपनिर्वाचन गर्दा २ करोड बढी खर्च प्रस्ताव गरिएको थियो । उपनिर्वाचनको अन्तिम खर्चको विवरण अझै सार्वजनिक गरिएको छैन ।

वागमति प्रदेशको राष्ट्रियसभा सदस्यको उपनिर्वाचनमा १ करोड ६० लाख र लुम्विनी प्रदेशको राष्ट्रियसभा निर्वाचनमा करिब १ कराेड जति खर्च हुने प्रस्ताव आयोगले तयार गरेको थियो । दुवै निर्वाचन क्षेत्रको निर्वाचन सम्पन्न भएपछि आयोगले उपनिर्वाचनको खर्च सार्जजनिक गर्ने जनाएको छ ।