आन्तरिक मूल्याङ्कनबाट वार्षिक नतिजा प्रकाशन गर्दै विद्यालय

१७ जेठ,चितवन । कोरोना संक्रमण बढेसंगै अहिले विद्यालयहरु बन्द भएका छन् । विद्यालयहरु बन्द भएपछि लिइएका परीक्षाको नतिजा कसरी प्रकाशन गर्ने भन्ने अन्योलता छ । चितवनमा विद्यालयहरुले आन्तरिक मूल्याङ्कनबाट वार्षिक नतिजा प्रकाशन गर्ने भएका छन् । बाल कक्षादेखि कक्षा ९ सम्मका विद्यार्थीको वार्षिक परीक्षाको नतिजा यही जेठ मसान्तभित्र गर्न लागिएको हो ।

शिक्षा विकास तथा समन्वय एकाइ चितवनका प्रमुख भूमिलाल सुवेदीका अनुसार विद्यालयले लिएको प्रथम त्रैमासिक परीक्षामा प्राप्त अङ्कको २० प्रतिशत र दोस्रो परीक्षामा प्राप्त अङ्कको ६० प्रतिशत अङ्क दिइने छ । बाँकी २० प्रतिशत विद्यार्थीको निरन्तर मूल्याङ्कनबाट अङ्क राखिने छ । विद्यार्थीको नियमित क्रियाकलाप, विभिन्न परियोजना, शिक्षक शिक्षिकाले विद्यार्थी र अभिभावकसँग गरिएका कल रिपोर्ट, अनलाइन परीक्षा लिएको भए त्यसमा प्राप्त अङ्कलगायतबाट २० अङ्क दिन लागिएको सुवेदीले जानकारी दिए ।

यही जेठ २५ गतेभित्र कक्षा ८ का विद्यार्थीको अङ्क सम्बन्धित पालिकामा पठाउन भनिएको छ । पालिकामार्फत कक्षा ८ को नतिजा सार्वजनिक गरिने छ । अन्य कक्षाको जेठ मसान्तभित्र नतिजा सार्वजनिक गर्न परिपत्र गरिएको सुवेदीले बताए । जिल्लाका निजी र केही सरकारी विद्यालयले निषेधाज्ञाको समयमा भर्चुअल माध्यमबाट परीक्षा र पढाइसमेत गरेका छन् ।

चितवनमा ३२३ सामुदायिक र २१६ संस्थागत विद्यालय रहेका छन् । ७७ हजार ३३९ सामुदायिक विद्यालयमा अध्ययनरत छन् भने ५७ हजार ४६३ संस्थागतमा अध्ययनरत छन् । नतिजा प्रकाशनसँगै आगामी असार १ गतेबाट नयाँ शैक्षिक सत्र शुरु हुनेछ ।