निषेधाज्ञा जेठ मसान्तसम्म थपिने, किराना पसल खोल्न दिने तयारी

१८ जेठ, काठमाडौं । काठमाडौं उपत्यकामा जेठ २० गतेसम्म जारी गरीएको निषेधाज्ञा कम्तिमा जेठ महिनाभर थप्ने तयारी गरिएको छ ।  निषेधाज्ञा थपिए पनि यस अवधिमा किराना पसल लगायत अति आवश्यक क्षेत्रहरु क्रमस खुला गर्दै लैजाने गृह प्रशासनको तयारी छ ।

तीन साता निषेधाज्ञा लागाउँदा पनि राजधानीमा संक्रमण नघटेपछि १४ गतेदेखि काठमाडौं उपत्यकामा किरना पसल समेत बन्द गरिएको छ । काठमाडौँका प्रमुख जिल्ला अधिकारी कालीप्रसाद पराजुलीले पहिलो तीन हप्ताको निषेधाज्ञामा कोरोना सङ्क्रमण नघटेपछि चौथो पटक थप कडाइ गरिएको र नतिजामा त्यसको प्रभावकारिता देखिएको बताएका छन्।

सोही रणनीतिअनुसार खाद्य, थोक तथा किराना पसल र डिपार्टमेन्ट स्टोरहरू पूर्ण रूपमा बन्द गरिएको छ । निषेधाज्ञा प्रभावकारी  देखियोकाले  कम्तिमा जेठ मसान्तसम्म निषेधाज्ञा थपिन सक्ने र  यस विषयमा उपत्यकाका प्रमुख जिल्ला अधिकारी र सुरक्षा प्रमुखको संयुक्त बैठकले टुंगाे लगाउने पराजुलीले जानकारी दिएका छन् ।

केही दिन यता सङ्क्रमितको सङ्ख्या केही कमी देखिएको छ । कोरोना सङ्क्रमणको दोस्रो लहर फैलिएसँगै यसको रोकथाम तथा नियन्त्रणका लागि काठमाडौँ उपत्यकामा निषेधाज्ञा जारी गरिएको एक महिना पुगेको छ । काठमाडौँ, ललितपुर र भक्तपुर तीनवटै जिल्लाका प्रमुख जिल्ला अधिकारीले वैशाख १६ देखि उपत्यकामा निषेधाज्ञा जारी गर्दै आएका छन् ।