प्रधानमन्त्री केपी ओली र राष्ट्रपति विद्यादेवी भण्डारीको पुत्ला दहन

१९ जेठ, सिराहा । प्रधानमन्त्री केपी ओलीले असंवैधानिक र प्रतिगमनकारी कदम चालेको भन्दै उपेन्द्र यादव पक्षीय जनता समाजवादी पार्टी नेपालका कार्यकर्ताहरुले प्रधानमन्त्री ओली र राष्ट्रपति विद्यादेवी भण्डारीको पुत्ला दहन गरेका छन् ।

सिराहा जिल्लाको नवराजपुर गाउँपालिकास्थित सोनबर्षा चौकको सडकखण्डमा आज मंगलबार दिउँसो प्रधानमन्त्री ओली र राष्ट्रपति भण्डारीको पुत्ला दहन गरेका हुन् । सो गाउँपालिकाका अध्यक्ष एवम् युवा नेता संजयकुमार यादवको अध्यक्षतामा सोनबर्षा चौकमै युवाहरुले प्रधानमन्त्री ओली र राष्ट्रपति भण्डारीको पुतला दहन गरेका हुन् ।

जनता समाजवादी पार्टी नेपाल, सिरहा जिल्लाका युवा नेता यादव, जसपा नेपालका नवराजपुर गाउँपालिका अध्यक्ष  यादव लगायतका विभिन्न नेता र कार्यकर्ताको उपस्थितिमा पुत्ला दहन कार्यक्रम गरिएको अध्यक्ष यादवले जनाए ।

यादवका अनुसार पछिल्लो समय असंवैधानिक र प्रतिगमनकारी कदम चालेका प्रधानमन्त्री ओलीलाई साथ दिएर महन्त ठाकुर र राजेन्द्र महतोले मधेश विरोधी गतिविधि गरेको आरोप उनीहरुको थियो । कार्यकारिणी समितिमा अल्पमतमा रहेका ठाकुर र महतोले पार्टीको आधिकारिक निर्णय नमानेर जर्बजस्ती गरेको उनीहरुको भनाई छ ।

ओली नेतृत्वको सरकारले प्रतिनिधिसभाबाट विश्वासको मत प्राप्त गर्न असफल भएपछि नेपालको संविधानको धारा ७६ अन्तर्गत वैकल्पिक सरकार गठन गर्न विभिन्न चरणका प्रयासहरू हुँदै गर्दा सर्वोच्च अदालतको गत २०७७ फागुन ११ गतेको फैसला बमोजिम पुर्नस्थापित प्रतिनिधिसभाको मन्त्रिपरिषदको सिफारिसमा राष्ट्रपतिले पुनः विघटन गरेकी थिइन।

अहिले त्यहाँ जुलुस र बिरोध प्रदर्शन भइरहेको छ ।असंवैधानिक र निरङ्कुश कदमको विरोधमा जुलुसमा सहभागी भएका जसपाको सबै नेता र र्कार्यकर्ताहरुलाई अध्यक्ष यादवले धन्यवाद दिएका छन् ।