नेपाल पक्षले बोलाएको केन्द्रीय कमिटी बैठकमा सहभागी नहुन ओली पक्षको आग्रह

२० जेठ, काठमाडौं । नेकपा एमालेको केपी ओली पक्षले माधव नेपाल पक्षले बोलाएको केन्द्रीय कमिटी बैठकमा सहभागी नहुन आग्रह गरेको छ । एमालेको ओली पक्षले विज्ञाप्तिमार्फत  नेपाल पक्षले बोलाएको बैठक अवैधानिक भएको भन्दै त्यस्ता गतिविधिमा संलग्न नहुन केन्द्रीय सदस्यहरुलाई सचेत गराएको हो ।

केन्द्रीय कार्यालय सचिव शेरवहादुर तामाङले आज प्रेस वक्तव्यमार्फत पार्टीले कारवाही गरेका अनधिकृत व्यक्तिले नेकपा एमाले केन्द्रीय कमिटीको बैठक बोलाएको भन्ने सुन्नमा आएको भन्दै त्यसको पार्टीले निन्दा र भर्त्सना गरेको जनाएका छन् ।

वक्तव्यमा भनिएको छ, ‘अध्यक्षसँगको परामर्शमा महासचिवले बैठक बोलाउने नेकपा (एमाले) को वैधानिक व्यवस्था विपरित पार्टीले कारवाही गरेका अनधिकृत व्यक्तिले नेकपा एमाले केन्द्रीय कमिटीको बैठक बोलाएको भन्ने सुन्नमा आएको छ , त्यस्तो कृयाकलापको निन्दा एवम् भत्र्सना गर्दछु,’ विज्ञप्तिमा भनिएको छ ।

माधव पक्षले आज केन्द्रीय कमिटी सदस्यहरुको बैठक बोलाएको छ । यस्तै ओली पक्षको स्थायी कमिटी बैठक बस्दै छ ।