प्रधानमन्त्री पक्षका वकिलहरुले लफडा निकालेपछि सुनुवाई प्रभावित !

२३ जेठ, काठमाडौं । प्रतिनिधिसभा विघटनलगायत मुद्दाको सुनुवाइ गर्न  पूनर्गठन गरिएको संवैधानिक इजलाशलाई लिएर प्रधानमन्त्री केपी शर्मा ओली पक्षका वकिलहरूले साेच्दै नसोचेको लफडा निकालेपछि सुनुवाई प्रभावित भएको छ ।

प्रधानमन्त्री तर्फका अधिवक्ताहरू राजाराम घिमिरे, कृष्णप्रसाद भण्डारी, दीपक मिश्र र यज्ञमणि न्यौपानेले संवैधानिक इजलाशको रोस्टरमा रहेका ११ जना न्यायाधीशहरू सबैले अहिलेको मुद्दा सुनुवाइ गर्न नमिल्ने भन्दै निवेदन दिने बताएपछि सुनुवाई अघि बढन नसकेको हो ।

उनीहरूले अहिले रोस्टरमा रहेका १३ जना न्यायाधीशहरूलाई संसदीय सुनुवाई समितिबाट अनुमोदन गर्दा रिट निवेदकमध्ये कतिपय सुनुवाई समितिका सदस्य भएकाले उनीहरूको मुद्दामा ती न्यायाधीशले सुनुवाई गर्न नमिल्ने तर्क गरेका  हुन् ।

इजालाशमा प्रधानन्यायाधीश राणाले वकिलहरूको यो तर्क मनासिव नभएको भन्दै न्यायाधीश र इजलाशलाई विश्वास गर्नु पर्ने बताएका थिए । उनले यसरी निवेदन दर्ता गरे अदालतको मानहानी हुने भन्दै त्यसतर्फ सचेत गराएका छन्  ।

तर वकिलहरुले भने निवेदन फिर्ता लिन मानिरहेका छैनन् । जसका कारण सुनुवाई प्रभावित भएको छ।