आइसियू र भेन्टिलेटर नहुँदा ज्यान गुमाउदै कोरोना संक्रमित

३१ जेठ,सर्लाही । आइसियू र भेन्टिलेटरको व्यवस्था नहुँदा जिल्लाका कोरोना संक्रमितले उपचार अभावमा ज्यान गुमाउनु परेको छ । कोरोना संक्रमण देखिएर उपचारका लागि अस्पताल भर्ना भएका बिरामीले उपचार अभावमा ज्यान गुमाउनुपरेको छ ।

कोरोना संक्रमण र कोरोना संक्रमणसँग मिल्दोजुल्दो लक्षण देखिएका बिरामी उपचारका लागि अस्पतालमा भर्ना भएका भए पनि आवश्यक भौतिक संरचना र भौतिक साधनको अभावमा उपचार नपाएका हुन् । स्वास्थ्य अवस्था खराब हुन थालेपछि अस्पतालले भेन्टिलेटर भएको अस्पतालमा लैजान सुझाव दिने गरेको छ ।

जिल्लामा कोरोना संक्रमणको लक्षण देखिएका र संक्रमणको आशङ्का गरिएका पनि होम आइसोलेशनमा रहेका छन् । आइसियु र भेन्टिलेटरको व्यवस्थापन भए गम्भीर बिरामीलाई जोगाउन सकिने अस्पतालका मेडिकल सुपरिटेन्डेन्ट डा सञ्जीव सिंहले बताए । उनले संक्रमित अन्तिम अवस्थामा अस्पताल आउने गरेका सुनाए ।

जिल्ला अस्पतालमा ५० श्ययाको कोरोना अस्पताल निर्माण गरिए पनि कोरोना संक्रमित जाँदैनन् । जिल्लाका अधिकांश कोरोना संक्रमित होम आइसोलेशनमा बसिरहेका बताइएको छ ।