निधि, शशांक र प्रकाशमान गोप्य वार्तामा

७ असार, काठमाडौं । नेपाली कांग्रेसको आसन्न महाधिवेशनमा शेरबहादुर देउवा दोस्रो कार्यकालका लागि क्रियाशील भएसँगै उनी पक्षकै विमलेन्द्र निधिको दौडधूप पनि तीब्र भएको छ ।

देउवाले प्रदेशस्तरीय केन्द्रीय सदस्यहरुसँग निरन्तर छलफल गरिरहेका बेला त्यसलाई काउण्टर दिन निधिले पनि गतिविधि अगाडि बढाएका छन् । आज उनले आफ्नै निवासमा दुई जना प्रभावशाली नेताहरु डा. शशांक कोइराला र प्रकाशमान सिंहलाई लञ्च मिटिङमा डाकेका छन् ।

बीपी कोइरालापुत्र डा. शशांक , गणेशमान सिंहपुत्र प्रकाशमान र महेन्द्र निधिपुत्र बिमलेन्द्रको यो भेटघाटलाई कांग्रेसभित्र निक्कै महत्वका साथ लिइएको छ ।

देउवाले निधिलाई विश्वास नगरेकाले उनी आक्रोशित छन् । त्यसैले यसपटक आफैं उम्मेदवार बन्ने जानकारी दिइसकेका छन् । यसैक्रममा आजको मिटिङ डाकिएको पनि निधि निकट स्रोतले बतायो । देउवालाई रोक्न मात्र नभइ अब अर्काे पुस्तामा नेतृत्व हस्तान्तरण गर्नका लागि आफूहरु एकजुट हुनुको विकल्प नरहेको निधि निकट स्रोतले बताएको छ ।

कांग्रेसलाई युवा पुस्ताकाे आकर्षक र समयानुकूल बनाउनुपर्ने भन्दै उनले अब नयाँ पुस्तामा नेतृत्व जानै पर्ने लबिङ थालेका छन् । सकेसम्म सर्वसम्मतिले नै चौधौं महाधिवेशनमा नेतृत्व चयन गर्ने उनको प्रस्ताव छ । त्यसका लागि आजको मिटिङ ज्यादै महत्वपूर्ण रहेको बताइएको छ । निधिले देशैभरिका नेता कार्यकर्ताहरुसँग संवाद थालेका छन् ।