घरधनी प्रधानलाई ससम्मान रिहा गर्न माग, सामाजिक सदभावमा आँच ल्याउन रुपा सुनारले सुनियोजित अतिरञ्जना गरेको नेवाःदबूको आरोप

९ असार, काठमाडौं । काठमाडौं ११ की घरधनी सरस्वती प्रधानलाई प्रहरीले गैह्रकानुनी रुपमा पक्राउ गरेको भन्दै नेवार समुदायको छाता संगठन नेवाः देय् दबूले आपत्ति प्रकट गरेको छ । सरस्वती प्रधानले पत्रकार रुपा सुनारलाई जातीय आधारमा घर भाडामा नदिएको भन्ने आरोपलाई संगठनले सुनियोजित अतिरञ्जना भनेको छ ।

नेवाः देय दबू जिल्ला समिति काठमाडौंका अध्यक्ष मचाराजा मर्हजनले प्रेस विज्ञप्ति जारी गर्दै घरधनी प्रधानले रुपा सुनारलाई कुनै गालीगलौज नगरेको र घरसल्लाह गरी खबर गर्छु भन्दाभन्दै सामाजिक सदभावमा आँच आउने गरी अतिरन्जित गरिएको यस किसिमका क्रियाकलाप खेदजनक रहेको बताएका छन् ।

प्रत्येक घरधनीलाई आफ्नो घर भाडामा दिँदा भाडामा बस्ने व्यक्तिको घर ठेगाना, पेशा, चालचलन तथा अन्य जानकारी सोध्ने अधिकार रहेको पनि सो विज्ञप्तिमा जनाइएको छ ।

अध्यक्ष महर्जनले जारी गरेको विज्ञत्तिमा भनिएको छ, ‘घरसल्लाह गरी खबर गर्छु भनेको र कुनै पनि करार वा बैना लिई सकेको अवस्था पनि नभएकोमा स्वयंले आफैं कामी भएर नदिने भनेको हो ? भन्दै आफै कुरा बढाएर फोन रेकर्ड गरी मिडियाकर्मी भन्दै शक्तिको दुरुपयोग गरी घरधनीलाई सुनियोजित रुपमा अतिरञ्जित गरेको देखिन्छ । घरधनीले कुनै जातीय विभेद गरेको देखिदैन् । ’

नेवाः दबूले सामाजिक सद्भावमा आँच आउने भएका यस्ता सुनियोजित क्रियाकलापको भर्सना गर्दै प्रधानको पक्राउ गैरकानूनी भएकोले स–सम्मान रिहाईको माग गरेको छ । नेवाः दबूले आफूहरु सबै खाले विभेदको विपक्षमा रहेको पनि जनाएको छ ।