संसद पुनस्थापना हुनसक्ने ओलीको आशंका, बालुवाटारमा को को ?

९ असार, काठमाडौं । प्रधानमन्त्री एवं नेकपा एमाले अध्यक्ष केपी ओलीले पार्टीका नेताहरुसँग छलफल गरेका छन् । अहिले प्रधानमन्त्रीको सरकारी निवास वालुवाटारमा आफू निकट नेतासँग उनले छलफल थालेका छन् ।

सर्वोच्च अदालतले २० जना मन्त्रीको नियुक्ती खारेज गरेसँगै ओलीले आगामी रणनीति तय गर्ने विषयमा नेताहरु सुवास नेम्वाङ, ईश्वर पोखरेल, विष्णु पौडेल, पार्टी निकट केही कानुनविद, पूर्वमन्त्री प्रदीप ज्ञावाली, सल्लाहकार विष्णु रिमाल लगायतसँग छलफल गरेको वालुवाटार निकट स्रोतले जनाएको छ । छलफलको अन्तिमतिर रामबहदुर थापा बादल र टोपबहादुर रायमाझी पनि वालुवाटार पुगेका थिए ।

प्रधानमन्त्री ओलीले मंगलबार अदालतबाट पदमुक्त भएका मन्त्रीसँग छलफल गरेका थिए । छलफलमा ओलीले पार्टीमा छलफल गरेपछि कसरी अघि बढ्ने भनेर निर्णय गर्ने बताएका थिए । ओलीले मन्त्रीलाई अरू केही बिकल्प सोच्न सक्ने भन्दै निवास नछाड्न र गाडी प्रयोग गर्न भनेका थिए ।

पदमुक्त भएलगत्तै झण्डा छोपेर बालुवाटार पुगेका मन्त्रीहरुलाई बुधबार पार्टी नेताहरुसँग छलफल गरेर धारणा सार्वजनिक गर्ने बताएका थिए । सर्वोच्चको आदेशपछि ओली राजनीतिक र कानुनी संकटमा परेपनि उनले राजीनामा भने दिएका छैनन । संसद विघटनपछि प्रधानमन्त्री ओलीले गरेको मन्त्रिपरिषद विस्तारलाई सर्वोच्च अदालतले अस्वीकार गरेपछि उनी राजनीतिक र कानुनी संकटमा परेसँगै आफू निकटका नेताहरुसँग छलफल गरेका हुन् ।

निर्वाचन गराउन दृढ रहेका ओलीले आजको छलफलमा सर्वोच्चबाट संसद पुर्नस्थापना हुनसक्ने संभावनालाई पनि ध्यानमा राखेर नेताहरुसँग छलफल गरेको स्रोतको दावी छ ।