बजेट अभावले देउरी भरुवाका शीतभण्डार अलपत्र

११ असार, राजविराज । सप्तरीको राजविराज नगरपालिकास्थित देउरी भरुवामा रहेको सहकारी शीतभण्डारको निर्माण कार्य बजेट अभावका कारण लामो समयदेखि अलपत्र परेको छ ।

जिल्लाका सहकारी संस्थाहरुको व्यवस्थापन विस्तार र यहाँ उत्पादित कृषि उपजको भण्डार र व्यवस्थापनमा सहयोग गरी किसानको जीवनस्तर उकास्ने मुख्य उद्देश्यले जिल्ला सहकारी सङ्घ सप्तरीले शीतभण्डार निर्माण गर्न लागेको हो ।

राजविराज नगरपालिका—१२ देउरी भरुवामा तीन हजार मेट्रिक टन क्षमताको शीतभण्डार बजेटको अभावमा अहिले निर्माण कार्य अलपत्र परेको हो । विसं २०७५ फागुनमा शिलान्यास भई निर्माण कार्य थालिएको शीतभण्डारको काम अहिलेसम्म करीब ५० प्रतिशत मात्र सम्पन्न भएको छ । पाँच च्याम्बर भएको शीतभण्डारको लम्बाई ४८ मिटर, चौडाइ ४०.८५ मिटर उचाई ९.५ मिटर रहने बताइएको छ ।

जिल्ला सहकारी सङ्घका प्रबन्धक रमेश प्रसाद गुप्ताका अनुसार शीतभण्डार निर्माणका लागि पहिलो किस्ता रु तीन करोड बजेट निकासा भएको भएपनि त्यो रकम सकेपछि अहिले बजेटको अभावमा एक वर्षदेखि निर्माण कार्य अलपत्र रहेको छ ।

सङ्घीय सरकारको ६० प्रतिशत अनुदान, सङ्घसंस्थाहरुको २० प्रतिशतमा तथा स्थानीय तथा प्रदेश सरकारको २० प्रतिशत भुक्तानीमा सो शीतभण्डार निर्माण गर्न लागिएको उनले जानकारी दिए । जिल्लामा उचित भण्डारण हुन नसक्दा सहकारी संस्था आवद्ध सदस्यहरुले बर्सेनी मार खेप्दै आएका छन् ।