पदको दावीले मात्रै कहीँ पुग्दैनौँ, खुल्ला बहस गरौँ: नेता गुरुङ

१५ असार, काठमाडौं । नेपाली कांग्रेसका नेता धनराज गुरुङले पदको दावीले मात्रै कहीँ नपुग्ने बताएका छन् । कांग्रेसको १४ औँ महाधिवेशन नजिकिएसँगै नेता गुरुङले पदको दावीले मात्र कही नपुग्ने भन्दै खुल्ला बहस गर्नु पर्ने बताएका हुन् ।

सामाजिक सञ्जालमा ट्वीटरमा एक ट्वीट गर्दै नेता गुरुङले भनेका छन्, “शिक्षा र स्वास्थ्य पुर्ण रुपमा निशुल्क नभएसम्म समाजवाद एउटा कथामा सिमित हुन्छ। तसर्थ कांग्रेसको १४ औँ महाधिवेशनबाट शिक्षा र स्वास्थ्य पुर्ण रुपमा निशुल्क गर्ने नीतिगत निर्णय गरौं । शैक्षिक मोडलको बारेमा पनि बहस चलाऔँ ।”

कांग्रेसको १४ औं महाधिवेशन भदौ १६ देखि १९ गतेसम्म काठमाडौंमा हुने गरी कार्यतालिका अनुमोदन गरिसकेकाे छ । कांग्रेसले साउन १२ गते गाउँ तथा नगरको वडाको अधिवेशन, साउन १६ गते गाउँपालिका, नगरपालिकाको अधिवेशन, साउन २० गते क्षेत्रीय अधिवेशन र एक मात्र प्रतिनिधिसभा निर्वाचन क्षेत्र भएको जिल्लामा साउन २३ गते तथा एकभन्दा बढी निर्वाचन क्षेत्र भएको जिल्लामा साउन २६ गते गर्ने निर्णय समेत गरिसकेको छ । त्यस्तै, प्रदेश अधिवेशन भदौ १ र २ गर्नुपर्ने छ ।

यता, पार्टी सभापति शेरबहादुर देउवाले फेरि पनि दोह¥याउन चाहेपछि पूर्व महामन्त्री प्रकाशमान सिंह, उपसभापति बिमलेन्द्र निधि र महामन्त्री डा। शशांक कोइरालाले एक आपसमा छलफललाई निरन्तरता दिइरहेका छन् ।  उनीहरुबीच सुरु भएको छलफलले कांग्रेस भित्र नयाँ तरंग ल्याएको छ । आवश्यकता अनुसार, टिम बनाउने उनीहरुले बताउने गरेका छन् ।

आज पनि पूर्वमहामन्त्री सिंहको निवासमा भएको तीन नेताको छलफलले शुक्रबार केन्द्रीय सदस्यहरूको भेला बोलाउने निर्णय गरेको हो । छलफलको दायरालाई फराकिलो बनाएर सबैसित कुराकानी गर्दै जाने कुरामा नेतात्रय सहमत भएका छन् ।

शुक्रबार महामन्त्री कोइरालाको निवास टोखामा पार्टीको १४ औं महाधिवेशनमा सभापतिका प्रत्यासीबाहेक केन्द्रीय सदस्यहरुसँग छलफल गर्ने उनीहरुको तयारी छ । त्यसपछि सभापतिका प्रयासी नेताहरुसँग छलफल गर्ने उनीहरुको रणनीति छ ।

महाधिवेशन तोकिएकै मितिभित्र सम्पन्न गराउन समेत नेताहरु एकमत देखिएका छन् । क्रियाशील सदस्यको विवाद पनि विधि प्रक्रिया अनुरुप समय सीमाभित्र नै सम्पन्न गराउने कुरामा समेत एकमत रहेको सिंहले बताए ।

संस्थापन पक्षबाट देउवा र निधिका अतिरिक्त गोपालमान श्रेष्ठले पनि उमेदवारी दिने बताएका छन् । तर संस्थापन इतर पक्षबाट भने धेरैले दावी गरेका छन् ।