आन्दोलनरत पक्षले उपकुलपति, शिक्षाध्यक्ष र रजिष्ट्रारलाई थुने ! स्थिति असामान्य

१५ असार, धरान । धरानस्थित बीपी कोइराला स्वास्थ्य विज्ञान प्रतिष्ठानमा भएको भ्रष्टाचार, आर्थिक अपारदर्शिता र बेथिति विरुद्ध आन्दोलनरत प्रतिष्ठानका चिकित्सक तथा कर्मचारीहरुले प्रतिष्ठानका पदाधिकारीहरुलाई मंगलबार अपरान्ह कार्यकक्षमा थुनेका छन् ।

प्रतिष्ठानका उपकुलपति प्रा. डा. ज्ञानेन्द्र गिरी, शिक्षाध्यक्ष प्रा. डा. गुरु खनाल र रजिष्ट्रार प्रा. डा. मोहनचन्द्र रेग्मीलाई आन्दोलनरत चिकित्सक तथा कर्मचारीहरुले उपकुलपतिको कार्यकक्षमा वार्ता भइरहेको अबस्थामा थुनेका हुन । पदाधिकारीहरु थुनिएपछि प्रतिष्ठान परिसरको स्थिति असामान्य बनेको छ ।

लामो समयदेखि प्रतिष्ठानमा भइरहेको अनियमितता र बेतिथिका विरुद्ध आन्दोलन गरिरहेका प्रतिष्ठानका चिकित्सक तथा कर्मचारीहरुले संयुक्त संघर्ष समिति बनाएर आइतबारदेखि रिले अनसन शुरु गरेका थिए । प्रतिष्ठानमा व्याप्त बेथिति, अव्यवस्थापन र भ्रष्टाचारजन्य अपराधमा प्रतिष्ठानका उपकुलपति गिरी, रजिष्ट्रार रेग्मी लगायतको प्रत्यक्ष संलग्नता रहेको आरोप छ । प्रतिष्ठानका अधिकांश पदाधिकारीहरुले नियुक्ती लिदाँ नै करोडौ रकम बुझाएर आउने गरेका छन् ।

त्यही भएर पनि प्रतिष्ठानमा आउने अधिकांश पदाधिकारीहरुले प्रतिष्ठान सुधार गर्ने भन्दा पनि कसरी अधिक भन्दा अधिक कमाउने भन्ने तर्फ केन्द्रीत हुने गरेको देखिन्छ । हालका रजिष्ट्रार रेग्मीले पनि नियुक्ती लिदाँ विभिन्न शक्ति केन्द्रहरुमा करिब सात करोड रुपैयाँ बुझाएको आरोप लाग्दै आएको छ । रजिष्ट्रार रेग्मीले नियुक्तीका लागि रकम बुझाउने क्रममा बालुवाटार सचिवालय र एमालेका एक प्रभावशाली नेताका नाममा झण्डै एक करोड भन्दा बढी रकम खर्चेकाे आरोप पनि छ ।

यस क्रमबाट प्रतिष्ठानमा निरन्तर र नियमित रुपमा बेतिथि र अनियमितता बढिरहेपछि सुधारका लागि माग राख्दै आन्दालन गरिरहेका समितिका सहसंयोजक डा. विष्णु पोखरेल नेतृत्वको टालीलाई पदाधिकारीहरुले वार्ताको लागि बोलाएका थिए । वार्ताका लागि पुगेका प्रतिनिधिहरुले उपकुलपति गिरीले मादक पदार्थ सेवन गरेको आरोप लगाएका छन् । उपकुलपति गिरीले मापसे गरेकै कारण वार्ता भाडिएको समितिका प्रतिनिधिहरुले बताएका छन् । उनी केही सन्ताह काठमाडौं बसेर आजमात्र प्रतिष्ठान हाजिर भएका थिए ।

यस क्रममा उनीहरुले प्रतिष्ठान सुधार्न नसकेको आरोप लगाउदै तीनै जना पदाधिकारीहरुलाई कार्यकक्षमै थुनेका थिए । पदाधिकारीहरुलाई थुनामुक्त गराउन प्रतिष्ठानमा ठूलो संख्यामा नेपाल प्रहरी र सशस्त्र प्रहरी परिचालन गरिएको छ भने उपकुलपतिको कार्यकक्ष अगाडि सयौको संख्यामा प्रतिष्ठानका चिकित्सक तथा कर्मचारीहरु आन्दोलित छन् ।

यसैबीच उपकुलपति गिरीले आफूले मादक पदार्थ सेवन नगरेको दावी गरेका छन् । उनले आफूलाई बदनाम गराउन केही समयदेखि परिचालित गिरोहले अफवाह फैलाएको बताए । प्रतिष्ठानका एक चिकित्सकका अनुसार उपकुलपति गिरी र रजिष्ट्रार रेग्मीबीच लामो समयदेखि द्धन्द्ध रहेको छ । रजिष्ट्रार रेग्मी कुनै पनि आहतमा उपकुलपति गिरीलाई विवादित र बदनाम गराएर कुनै अनियमिततामा फसाएर पदमुक्त गराइ आफू उपकुलपति बन्ने दाउमा छन् । त्यही भएर पनि आज उपकुलपति गिरीलाई मापसे गरेको आरोप लगाइ बदनाम गराउने यो अभियानमा रजिष्ट्रार रेग्मीकै संलग्नता रहेको केही जिम्मेवार चिकित्सक तथा कर्मचारीहरुले अनुमान गरेका छन् ।