बीपी कोइराला स्वास्थ्य विज्ञान प्रतिष्ठानमा तालाबन्दी, चारै पदाधिकारीको राजीनामा माग

१७ असार, धरान । बीपी कोइराला स्वास्थ्य विज्ञान प्रतिष्ठान धरान दिन प्रतिदिन अस्तब्यस्त बन्दै गएको छ । प्रतिष्ठानमा भएको भ्रष्टाचार, आर्थिक अपारदर्शिता र बेथिति विरुद्ध दुई सातादेखि आन्दोिलत चिकित्सक तथा कर्मचारीको माग पुरा गर्न नसक्दा अस्पताल थप अस्तब्यस्त बन्दै गएको हो ।

यस क्रममा आन्दोलनरत पक्षले प्रतिष्ठानका चारजना पदाधिकारीहरुको कार्यकक्षमा हिजो तालाबन्दी गरेका छन् । अस्ती आन्दोलनरत पक्षलाई वार्तामा बोलाए पनि वार्ता भाडिएको थियो । उपकुलपति प्रा.डा.ज्ञानेन्द्र गिरीले वार्तामा आउँदा मदिरा पिएर आएको आरोप छ । अस्ति वार्ता प्रक्रिया अगाडि बढ्न नसकेपछि आन्दोलनरत चिकित्सक तथा कर्मचारीहरुले उपकुलपति गिरीका साथै शिक्षाध्यक्ष प्रा. डा गुरु खनाल र रजिष्ट्रार प्रा. डा. मोहनचन्द्र रेग्मीलाइ कार्यकक्षमै थुनेका थिए ।

थुनामा परेको ति पदाधिकारीहरुलाई हिजो राती ८ बजे ठुलो संख्यामा परिचालित सुरक्षाकर्मीको सहायतामा थुनामुक्त गराइएको थियो । संयुक्त संघर्ष समितिले यहाँका पदाधिकारीहरुसँग वार्तामा नबस्ने र चारै जना पदाधिकारीहरुले राजीनामा दिनुपर्ने माग राख्दै आज कार्यकक्षमा तालाबन्दी गरेका छन् ।

प्रतिष्ठानमा व्याप्त बेथिति, अव्यवस्थापन र भ्रष्टाचारजन्य अपराधमा प्रतिष्ठानका उपकुलपति गिरी, रजिष्ट्रार रेग्मी लगायतको प्रत्यक्ष संलग्नता रहेको आरोप छ । प्रतिष्ठानका अधिकांश पदाधिकारीहरुले नियुक्ती लिदा नै करोडौं रकम बुझाएर आउने गरेका छन् । त्यही भएर पनि प्रतिष्ठानमा आउने अधिकांश पदाधिकारीहरुले प्रतिष्ठान सुधार गर्ने भन्दा पनि कसरी अधिक भन्दा अधिक कमाउने भन्नेतर्फ केन्द्रीत हुने गरेको देखिन्छ ।

हालका रजिष्ट्रार रेग्मीले पनि नियुक्ती लिदां विभिन्न शक्ति केन्द्रहरुमा करिब सात करोड रुपैयाँ बुझाएको आरोप लाग्दै आएको छ । रजिष्ट्रार रेग्मीले नियुक्तीका लागि रकम बुझाउने क्रममा बालुवाटार सचिवालय र एमालेका एक प्रभावशाली नेताका नाममा झण्डै एक करोड भन्दा बढी रकम खर्चेको आरोप पनि छ ।

प्रतिष्ठान सुधारका लागि माग राख्दै आन्दालन गरिरहेको समितिले प्रधानमन्त्रीकै पहलमा उच्चस्तरीय वार्ता टोलीको गठन गर्न माग गरेको छ । संघर्ष समितिले यहाँको पदाधिकारीहरु चयन गर्दा विशिष्टिकृत एवं विज्ञहरुको समुह बनाएर उक्त समुहले सिफारिश गरेको व्यक्ति मात्र चयन हुने वातावरण बनाउन पनि माग गरेको छ ।

मागहरु पुरा गर्न संयुक्त संघर्ष समितिले एक हप्ताको अल्टिमेटम दिदै सम्बोधन नगरे सामुहिक राजीनामा दिने र प्रधानमन्त्री कार्यालय घेराउ गर्न काठमाडौं जाने घोषणा गरेको छ । प्रतिष्ठानका चार पदाधिकारीहरु बीच बेमेलका कारण संस्था दिनप्रतिदिन धरासयी बनेको चिकित्सकहरुको आरोप छ ।

प्रतिष्ठानका उपकुलपति गिरी र रजिष्ट्रार रेग्मीबीच लामो समयदेखि द्धन्द्ध रहेको छ । हिजोको वार्ताको क्रममा पनि रजिष्ट्रार रेग्मीले नै उपकुलपति गिरीले मादक पदार्थ सेवन गरेको प्रोपोगाण्डा सिर्जना गरेर उनलाई विवादित र बदनाम गराउने काम गरेको आरोप चिकित्सक तथा कर्मचारीहरुको छ ।